Read La Bible en Malgache 1Korintiana 16 Bible Online

1Korintiana 16 - La Bible en Malgache bible

1Korintiana 16

¹Ny amin’ny famoriam-bola ho an’ny olona masina dia mba manaova koa ianareo, toy izay nasaiko nataon’ny fiangonana any Galatia.

²Amin’ny andro voalohany amin’ny herinandro dia samia manokana tahiry any an-tranony avy araka izay azony atao fanomezana mba tsy ho amin’ny fahatongavako vao hatao ny fanangonana izany.

³Rehefa tonga aho dia izay olona ankasitrahanareo no hirahiko, mitondra taratasy, hanatitra ny fanomezanareo ho any Jerosalema.

⁴Ary raha tokony handeha ho any koa aho dia hiaraka amiko ireo.

⁵Hankaty aminareo aho rehefa avy mamakivaky an’i Makedonia, fa hamakivaky an’i Makedonia mantsy aho;

⁶angamba hitoetra eo aminareo aho, na handany ny ririnina aza, mba hamatsianareo ahy any amin’izay halehako.

⁷Fa tsy mikasa hamangy anareo toy ny mandalo fotsiny aho ankehitriny; fa manantena hijanona elaela any aminareo aho raha sitrapon’ny Tompo.

⁸Nefa hijanona any Efesosy aho mandra-piavin’ny Pentekosta;

⁹fa varavarana lehibe no voavoha ho ahy hahazoako miasa tsara, nefa maro ny mpanohitra.

¹⁰Rehefa tonga i Timoty dia tandremo mba tsy hanan-tahotra izy eo anivonareo; fa ny asan’ny Tompo no ataony, tahaka ny ataoko koa.

¹¹Koa aza avela hisy olona hanao tsinontsinona azy; fa vatsio tsara izy mba ho tonga atỳ amiko; fa miandry azy mbamin’ny rahalahy sasany aho.

¹²Ary ny amin’ny rahalahy Apolosy dia niangavy azy fatratra aho hiaraka amin’ny rahalahy hankaty aminareo, nefa tsy sitrapony mihitsy ny handeha izao; fa ho avy ihany izy rehefa misy andro mahalalaka azy.

¹³Miambena ianareo, tomoera tsara amin’ny finoana, aoka hitomban-dahy, mahereza.

¹⁴Izay rehetra ataonareo dia ataovy amin’ny fitiavana!

¹⁵Fantatrareo ny ankohonan’i Stefanasy fa voaloham-bokatr’i Akaia izy sady efa nanolo-tena ho amin’ny fanompoana ny olona masina; dia mangataka aminareo aho, ry rahalahy,

¹⁶mba hanaiky tsara ny olona tahaka ireny sy izay rehetra miara-miasa sy mikely aina koa ianareo.

¹⁷Faly aho noho ny fahatongavan’i Stefanasy sy i Fortonato ary i Akaìko; fa ireo no nahefa ny tsy vitanareo;

¹⁸fa namelombelona ny fanahiko sy ny anareo koa izy; koa mahaiza mankasitraka ny olona tahaka ireny.

¹⁹Manao veloma anareo ny fiangonana[9] atỳ Azia. Manao veloma anareo indrindra ao amin’ny Tompo i Akoila sy i Prisila mbamin’ny fiangonana izay ao an-tranony.

²⁰Manao veloma anareo ny rahalahy rehetra. Mifanaova veloma amin’ny fanorohana masina.

²¹Ny tanako, izaho Paoly, no anaovako veloma.

²²Raha misy tsy tia ny Tompo dia aoka ho voaozona izy! Marana ta[10].

²³Ho aminareo anie ny fahasoavan’i Jesosy Kristy* Tompo.

²⁴Ny fitiavako dia ao aminareo rehetra ao amin’i Kristy Jesosy.