Read La Bible en Malgache 1Korintiana 3 Bible Online

1Korintiana 3 - La Bible en Malgache bible

1Korintiana 3

¹Fa izaho, ry rahalahy, dia tsy nahazo niteny taminareo tahaka ny amin’izay araka ny Fanahy fa tahaka ny amin’izay mbola araka ny nofo, dia tahaka izay mbola zaza ihany ao amin’i Kristy*.

²Ronono no nomeko anareo fa tsy ventin-kanina satria tsy mbola natanjaka ianareo; eny, tsy mbola matanjaka aza mandraka ankehitriny

³fa mbola araka ny nofo ihany ianareo. Fa raha misy fialonana sy fifandirana eo aminareo, tsy araka ny nofo va ianareo ka mandeha araka ny fanaon’ny olona?

⁴Fa raha hoy ny iray: Izaho dia an’i Paoly, ary ny iray kosa: Izaho dia an’i Apolosy, moa tsy olona ihany va ianareo?

⁵Fa inona moa i Apolosy, ary inona moa i Paoly? Mpanompo ihany izy ireo, izay nahatonga anareo ho mpino, dia samy araka ny nomen’ny Tompo azy avy.

⁶Izaho no namboly, i Apolosy no nanondraka, fa Andriamanitra no nampitombo.

⁷Koa tsinontsinona izay mamboly, na izay manondraka, fa Andriamanitra, izay mampitombo, no tena izy.

⁸Iray ihany ny mpamboly sy ny mpanondraka; nefa samy handray izay valim-pitiany avy araka ny fisasarany izy ireo.

⁹Fa mpiara-miasa amin’Andriamanitra izahay ary sahan’Andriamanitra sy trano arafitr’Andriamanitra ianareo.

¹⁰Araka ny fahasoavan’Andriamanitra nomena ahy dia tahaka ny fanaon’ny mpanao mari-trano hendry no nametrahako ny fanorenana, fa olon-kafa no mandrafitra eo amboniny; nefa aoka ny olona rehetra hitandrina izay arafiny eo amboniny.

¹¹Fa tsy misy mahay mametraka fanorenana hafa afa-tsy izay efa eo, dia Jesosy Kristy*.

¹²Ary raha misy mandrafitra volamena, na volafotsy, na vatosoa, na hazo, na bozaka, na mololo, eo ambonin’ny fanorenana,

¹³dia haseho avokoa ny asan’ny olona rehetra; fa ny andro no hampiseho azy, satria haseho amin’afo izany andro izany, dia hozahan-toetra amin’ny afo ny asan’ny olona rehetra.

¹⁴Raha maharitra ny asan’ny olona izay narafiny teo amboniny dia handray valim-pitia izy.

¹⁵Raha levon’ny afo ny asan’ny olona dia ho maty antoka izy; fa ny tenany kosa dia hovonjena, nefa toy ny avy ao amin’ny afo ihany.

¹⁶Tsy fantatrareo va fa tempolin’Andriamanitra ianareo ary ny Fanahin’Andriamanitra no mitoetra ao anatinareo?

¹⁷Raha misy manimba ny tempolin’Andriamanitra dia mba hosimban’Andriamanitra kosa izy; fa masina ny tempolin’Andriamanitra, dia ianareo izany.

¹⁸Aza misy mamita-tena. Raha misy eo aminareo milaza azy ho hendry amin’izao tontolo izao dia aoka ho adala izy mba ho tonga hendry.

¹⁹Fa ny fahendren’izao tontolo izao dia fahadalana eo anatrehan’Andriamanitra; fa voasoratra hoe: «Ny hafetsen’ny hendry ihany no entiny misambotra azy» (Job 5.13).

²⁰Ary izao koa: «NY TOMPO mahalala ny fihevitry ny hendry, fa zava-poana izany» (Sal 94.11).

²¹Koa aoka tsy hisy hanao olona ho reharehany; fa anareo ny zavatra rehetra,

²²na i Paoly, na i Apolosy, na i Kefasy, na izao tontolo izao, na fiainana, na fahafatesana, na ny zavatra ankehitriny, na ny zavatra ho avy. Izany rehetra izany dia anareo;

²³ary ianareo dia an’i Kristy*, ary Kristy an’Andriamanitra.