Read La Bible en Malgache 1Korintiana 4 Bible Online

1Korintiana 4 - La Bible en Malgache bible

1Korintiana 4

¹Koa aoka hataon’ny olona ho mpanompon’i Kristy* sy mpitantana fananana ny amin’ny zavamiafina izay an’Andriamanitra izahay.

²Ary raha izany, izay ilaina amin’ny mpitantana fananana dia ny ho mahatoky.

³Fa raha ny amiko, dia tsy mampaninona ahy velively, na hotsarainareo aho na hotsarain’olona; fa ny tenako aza dia tsy mitsara ahy.

⁴Fa tsy hitako izay tsiniko, nefa tsy mahamarina ahy izany; fa ny Tompo no mitsara ahy.

⁵Koa amin’izany, aza mitsara na inona na inona alohan’ny fotoana, dia ny fiavian’ny Tompo, izay hampiharihary ny zavatra takona ao amin’ny maizina ka hampiseho ny fikasan’ny fo; dia samy hahazo izay dera sahaza azy avy amin’Andriamanitra ny tsirairay.

⁶Izany zavatra izany, ry rahalahy, dia nataoko oha-teny noho ny aminareo, mba hilazana ahy sy i Apolosy, mba hianaranareo aminay ny tsy hihoatra noho izay voasoratra ianareo ka tsy hisy hireharehanareo hankalaza ny iray na hanevateva ny iray hafa kosa.

⁷Fa iza no nanome tombony anao amin’ny hafa? Ary inona no anananao, izay tsy noraisinao? Fa raha nandray ihany ianao, nahoana no mirehareha ohatra ny tsy nandray?

⁸Efa afa-po sahady ianareo, efa manankarena sahady ianareo, efa manjaka tsy miaraka aminay ianareo; kanefa hay tsy izahay akory no nahazoanareo izany! Enga anie ka hanjaka tokoa ianareo mba hiarahanay manjaka aminareo koa!

⁹Fa ataoko fa nasehon’Andriamanitra ho faraidiny izahay Apostoly, dia toy izay voaheloka ho faty; fa izahay dia natao ho fizahan’izao rehetra izao, na anjely na olona.

¹⁰Izahay dia adala noho ny amin’i Kristy* fa ianareo no hendry ao amin’i Kristy! Izahay dia malemy fa ianareo no mahery! Ianareo dia manan-daza fa izahay no mavomavo!

¹¹Mandraka ankehitriny izao dia noana, mangetaheta, tsy manan-kitafy, asiana totohondry ary tsy manam-ponenana izahay;

¹²misasatra miasa amin’ny tananay izahay; raha tevatevaina izahay dia misaotra; raha enjehina dia miaritra;

¹³raha endrikendrehina dia mamaly amin’ny fahalemem-panahy kosa; atao toy ny fakofakon’izao tontolo izao izahay, dia fakon’olona rehetra, mandraka ankehitriny.

¹⁴Tsy ny hahamenatra anareo anefa no anoratako izany zavatra izany, fa mananatra anareo toy ny zanako malalako aho.

¹⁵Fa na manana mpampianatra iray alina ao amin’i Kristy* aza ianareo dia tsy maro akory ny rainareo; fa izaho no niteraka anareo ao amin’i Kristy Jesosy tamin’ny Filazantsara.

¹⁶Koa mandrisika anareo aho: Manahafa ahy ianareo.

¹⁷Noho izany dia nirahiko ho any aminareo i Timoty, zanako malalako sady mahatoky ao amin’ny Tompo, koa izy no hampahatsiaro anareo ny fombam-piainako rehetra ao amin’i Kristy, tahaka ny ampianariko amin’ny fiangonana[1] rehetra eny tontolo eny.

¹⁸Fa mirehareha ny sasany ary ohatry ny hoe tsy mikasa ho avy any aminareo iny aho.

¹⁹Ho avy any aminareo haingana anefa aho, raha sitrapon’ny Tompo, dia ho fantatro izay herin’ireo mpirehareha ireo, fa tsy ny fiteniny.

²⁰Fa tsy amin’ny teny ny fanjakan’Andriamanitra fa amin’ny hery.

²¹Inona ary no tianareo? Ho avy aminareo mitondra tsorakazo va aho, sa amin’ny fitiavana sy ny fahalemem-panahy?