Read La Bible en Malgache 1Korintiana 5 Bible Online

1Korintiana 5 - La Bible en Malgache bible

1Korintiana 5

¹Efa re hatraiza hatraiza fa misy fijangajangana atỳ aminareo; eny, fijangajangana izay tsy misy tahaka azy na dia amin’ny Jentilisa* aza, fa misy olona ao aminareo manambady ny vadin-drainy.

²Ary ianareo indray va no mirehareha! Ary tsy nampalahelo anareo akory izany ka mba hesorina tsy ho ao aminareo ilay nanao izany zavatra izany!

³Fa izaho, na dia tsy teo aza ny tenako, nefa teo ihany ny fanahiko, dia efa nitsara sahady an’ilay nanao fihetsika toy izany, tahaka ny nanatrika teo ihany:

⁴Amin’ny anaran’i Jesosy Tompontsika, rehefa tafangona ianareo sy ny fanahiko omban’ny herin’i Jesosy Tompontsika,

⁵dia aoka hatolotra ho an’i Satana izany olona izany hanimbana ny nofony mba hahavoavonjy ny fanahiny amin’ny andron’i Jesosy Tompo.

⁶Tsy mety ny fireharehanareo. Tsy fantatrareo va fa ny masirasira kely dia mahazo ny vongana manontolo?

⁷Esory ny masirasira tranainy mba ho vongana vaovao ianareo, araka izay tsy isian’ny masirasira anareo. Fa voavono Kristy*, Paska ho antsika;

⁸koa aoka isika hanao andro firavoravoana, tsy amin’ny masirasira tranainy, na amin’ny masirasiran’ny lolompo sy ny haratsiam-panahy, fa amin’ny mofo tsy misy masirasira, dia ny fahadiovam-po sy ny fahamarinana.

⁹Nanoratra taminareo teo amin’ny epistily aho mba tsy hiharoharoanareo amin’izay mpijangajanga;

¹⁰nefa tsy ny mpijangajanga rehetra amin’izao tontolo izao, na ny fatra-pitia harena sy ny mpanao an-keriny, na ny mpanompo sampy; fa raha izany dia tsy maintsy miala amin’izao tontolo izao ianareo.

¹¹Fa ny nanoratako taminareo dia ny mba tsy hiharoharoanareo amin’izay atao hoe rahalahy kanefa mpijangajanga, na fatra-pitia harena, na mpanompo sampy, na mpanala baraka olona, na mpimamo, na mpanao an-keriny. Aza miara-mihinana akory amin’ny olona toy izany ianareo.

¹²Fa ataoko ahoana moa ny hitsara ny any ivelany? Tsy ny ao anatiny va no tsarainareo?

¹³Fa ny any ivelany dia tsarain’Andriamanitra. Esory aminareo ilay mpanao ratsy.