Read La Bible en Malgache 1Korintiana 8 Bible Online

1Korintiana 8 - La Bible en Malgache bible

1Korintiana 8

¹Ny amin’ny hena naterina tamin’ny sampy dia fantatsika fa manana fahalalana isika rehetra. Ny fahalalana dia mampieboebo, fa ny fitiavana no mampandroso.

²Fa raha misy mihevitra ny tenany ho mahalala zavatra dia tsy mbola mahalala araka izay tokony ho fantany akory izy.

³Fa raha misy tia an’Andriamanitra dia izy no fantany.

⁴Ary ny amin’ny mihinana ny hena naterina tamin’ny sampy dia fantatsika fa tsinontsinona ny sampy amin’izao tontolo izao, ary tsy misy Andriamanitra afa-tsy iray ihany.

⁵Fa na dia misy aza lazaina hoe andriamanitra, na any an-danitra, na etỳ an-tany, toy ny hoe misy andriamanitra maro sy tompo maro,

⁶amintsika kosa dia iray ihany Andriamanitra, dia ny Ray izay niavian’ny zavatra rehetra, ary ho Azy isika; ary iray ihany ny Tompo, dia Jesosy Kristy* izay nahariana ny zavatra rehetra sady nahariana antsika koa.

⁷Kanefa tsy ary manana izany fahalalana izany avokoa ny olona rehetra; fa ny sasany, satria zatra amin’ny sampy mandraka ankehitriny izao, dia homana ny hena ka mahatsiaro azy ho zavatra naterina tamin’ny sampy; koa voaloto ny fieritreretany satria malemy.

⁸Fa tsy ny hanina akory no hampifanakaiky antsika amin’Andriamanitra; fa na dia tsy homana aza isika dia tsy matiantoka, ary na dia homana kosa aza isika dia tsy mahazo tombony.

⁹Tandremo anefa, fandrao ho tonga fahatafintohinana ho an’ny malemy finoana izany fahafahanareo izany.

¹⁰Fa raha misy mahita anao izay manam-pahalalana mipetraka mihinana ao amin’ny tempolin’ny sampy, tsy hampahasahy ny fieritreretan’ny malemy finoana hihinana izay hena naterina tamin’ny sampy koa va izany?

¹¹Fa very noho ny fahalalanao ny malemy finoana, dia ny rahalahy izay navotan’i Kristy tamin’ny fahafatesany!

¹²Fa raha manota toy izany amin’ny rahalahy ianareo ka mandratra ny fieritreretan’ny malemy finoana dia manota amin’i Kristy ianareo.

¹³Koa raha ny hanina no mahatafintohina ny rahalahiko dia tsy hihinana izay hena akory aho mandrakizay, fandrao mahatafintohina ny rahalahiko.