Read La Bible en Malgache 2Korintiana 1 Bible Online

2Korintiana 1 - La Bible en Malgache bible

2Korintiana 1

¹I Paoly, apostolin’i Kristy* Jesosy noho ny sitrapon’Andriamanitra, ary i Timoty rahalahy, no mamangy ny fiangonan’Andriamanitra izay any Korinto mbamin’ny olona masina rehetra manerana an’i Akaia:

²Ho aminareo anie ny fahasoavana sy ny fiadanana avy amin’Andriamanitra Raintsika sy Jesosy Kristy Tompo.

³Isaorana anie Andriamanitra, Rain’i Jesosy Kristy* Tompontsika, Rain’ny famindrampo sady Andriamanitry ny fampiononana rehetra,

⁴izay mampionona anay amin’ny fahorianay rehetra mba hahaizanay mampionona izay rehetra mitondra fahoriana kosa, amin’ny fampiononana izay ampiononan’Andriamanitra anay.

⁵Fa araka ny haben’ny fijalian’i Kristy mihatra aminay no haben’ny fampiononana anay kosa amin’ny alalan’i Kristy.

⁶Ary raha ampahorina izahay dia ho fampiononana sy famonjena anareo izany; ary raha ampiononina izahay dia ho fampiononana anareo izany ka miasa amin’ny fiaretanareo fahoriana mitovy indrindra amin’izay entinay.

⁷Ary mafy orina tsara ny fanantenanay ny aminareo, satria fantatray fa tahaka ny iombonanareo ny fahoriana no iombonanareo ny fampiononana koa.

⁸Fa tsy tianay tsy ho fantatrareo, ry rahalahy, ny amin’ny fahoriana izay nanjo anay tany Azia, fa novesarana indrindra mihoatra noho ny zakanay izahay ka efa saika nafoinay hatramin’ny ainay aza;

⁹eny, tsy nanampo izay ho velona intsony izahay, mba tsy hitokianay amin’ny tenanay fa amin’Andriamanitra izay manangana ny maty.

¹⁰Ary Izy no nahafaka anay tamin’izao fahafatesana lehibe izao, ary mbola hanafaka koa; eny, Izy no antenainay fa mbola hanafaka anay hatrany,

¹¹satria ianareo koa dia miara-miasa ho anay amin’ny fivavahanareo, mba hisaoran’ny maro ny aminay noho ny fahasoavana azonay tamin’ny nataon’ny maro.

¹²Fa izao no ataonay ho rehareha: Ny fieritreretanay no vavolombelona fa tamin’ny fahatsorana sy ny fahadiovam-po avy amin’Andriamanitra, ary tsy tamin’ny fahendrena ara-nofo, fa tamin’ny fahasoavan’Andriamanitra, no nitondranay tena teo amin’izao tontolo izao, indrindra fa teo aminareo.

¹³Fa tsy manoratra teny hafa aminareo izahay, afa-tsy izay vakinareo na izay fantatrareo; ary manantena aho fa mbola ho fantatrareo ny farany,

¹⁴araka ny efa fantapantatrareo ihany fa reharehanareo izahay, dia tahaka anareo kosa izay reharehanay amin’ny andron’i Jesosy Tompontsika.

¹⁵Ary tamin’izany fahatokiana izany dia nikasa hankaty aminareo aloha aho mba hahazoanareo soa fanindroany,

¹⁶ary nikasa hankany Makedonia raha avy atỳ aminareo, ary hiverina ho atỳ aminareo indray raha avy any Makedonia, dia mba hovatsinareo ny diako ho any Jodia*.

¹⁷Koa raha nikasa izany aho, moa nanao kitoatoa va aho? Ary izay zavatra kasaiko, moa kasaiko araka ny nofo va, mba hanaovako eny, eny foana, sy tsia, tsia foana?

¹⁸Fa raha mahatoky koa Andriamanitra, ny teninay taminareo dia tsy hoe sady eny no tsia;

¹⁹fa ny Zanak’Andriamanitra, dia Jesosy Kristy*, izay notorinay teo aminareo, dia izaho sy i Silasy ary i Timoty, dia tsy hoe sady eny no tsia, satria ao Aminy dia eny ihany.

²⁰Fa na firy na firy ny teny fikasan’Andriamanitra dia ao Aminy ny eny ary amin’ny alalany koa ny Amena, ho voninahitr’Andriamanitra amin’ny ataonay.

²¹Fa izay mampitoetra anay sy ianareo ao amin’i Kristy sady nanosotra antsika dia Andriamanitra

²²izay nanisy tombo-kase antsika koa ka nanome ny Fanahy ho santatra ato am-pontsika.

²³Ary miantso an’Andriamanitra ho vavolombelona ny amin’ny fanahiko aho, fa ny fialako nenina aminareo ihany no tsy mbola nankanesako tatỳ Korinto.

²⁴Kanefa tsy mihambo ho tompon’ny finoanareo izahay fa mpiara-miasa hampandroso ny fifalianareo, satria finoana no mahatafajoro anareo.