Read La Bible en Malgache 2Korintiana 10 Bible Online

2Korintiana 10 - La Bible en Malgache bible

2Korintiana 10

¹Ary ny tenako, izaho Paoly, dia mananatra anareo amin’ny halemem-panahy sy ny hamoram-pon’i Kristy*, dia izaho izay manetry tena, hono, raha eo anatrehanareo, fa feno fahasahiana aminareo kosa raha tsy eo.

²Miangavy anareo aho: Aoka mba tsy ho amin’ny fahasahiana no hanehoako ny fahatokiako raha tonga aho; fa izany fahasahiana izany no kasaiko haseho amin’ny sasany izay milaza anay ho mandeha araka ny nofo.

³Fa na dia velona amin’ny nofo aza izahay dia tsy mba miady araka ny nofo,

⁴fa tsy avy amin’ny nofo ny fiadian’ny tafikay fa manan-kery avy amin’Andriamanitra mba handrava manda. Mandrava ny fisainana

⁵sy ny zavatra avo rehetra izay atsangana hanohitra ny fahalalana an’Andriamanitra izahay ka mamabo ny hevitra rehetra hanaiky an’i Kristy,

⁶ary vonona hamaly ny tsy fankatoavana rehetra izahay, rehefa tanteraka ny fankatoavanareo.

⁷Mijery zavatra araka ny fisehony ihany ianareo. Raha misy olona matoky tena fa an’i Kristy dia aoka izy hisaintsaina izao indray: Fa tahaka ny maha an’i Kristy azy, no maha an’i Kristy anay koa.

⁸Fa na dia bebe ihany aza ny fireharehako ny amin’ny fahefana izay nomen’i Kristy anay ho fampandrosoana, fa tsy ho fandravana anareo, dia tsy ho menatra ny amin’izany aho.

⁹Fa tsy te hiseho ho mpampitahotra anareo amin’ny epistily nalefako aho.

¹⁰Fa ny epistiliny, hoy ry zareo, dia mavesatra sy mahery; nefa malemy kosa ny fanatrehan’ny tenany, ary tsinontsinona ny teniny.

¹¹Aoka izany olona izany hahafantatra fa tahaka ny fiteninay amin’ny epistily, raha tsy eo izahay, dia ho tahaka izany koa ny asanay rehefa tonga izahay.

¹²Fa tsy sahy hilaza ny tenanay ho isan’ny sasany izay midera tena izahay, na koa hampitaha ny tenanay aminy; fa tsy hendry ireny, satria manohatra ny tenany amin’ny tenany sy mampitaha ny tenany amin’ny tenany.

¹³Fa tsy mba hirehareha mihoatra noho izay tokony ho izy izahay fa araka izay voafaritr’Andriamanitra ho anjaranay, dia ny hahatongavanay any aminareo koa.

¹⁴Fa tsy toy ny olona izay tsy mbola tonga tany aminareo izahay ka ho mihoatra ny faritry ny anjaranay; fa efa tonga tany aminareo tokoa tamin’ny Filazantsaran’i Kristy izahay;

¹⁵tsy mirehareha mihoatra ny tokony ho izy izahay ka hirehareha amin’izay nisasaran’ny sasany, fa manana fanantenana izahay fa rehefa mitombo ny finoanareo dia mihalehibe ao aminareo koa izahay, araka izay voafaritra ho anjaranay, sady mbola handroso ihany

¹⁶ka hitory ny Filazantsara any ivelan’ny faritra misy anareo, mba tsy hireharehanay amin’ny asa efa vitan’ny hafa.

¹⁷Fa «izay mirehareha dia aoka NY TOMPO no ho reharehany» (Jer 9. 23).

¹⁸Fa tsy izay midera tena no ankasitrahana fa izay derain’ny Tompo.