Read La Bible en Malgache 2Korintiana 11 Bible Online

2Korintiana 11 - La Bible en Malgache bible

2Korintiana 11

¹Enga anie ka mba handefitra amiko amin’ny hadalana kely ianareo, eny mandefera amiko ianareo!

²Fa fahasaro-piaro araka an’Andriamanitra no mahasaro-piaro ahy aminareo; fa nataoko fofombadin’ny lehilahy iray ianareo, mba hatolotro tahaka ny virijiny madio ho an’i Kristy*.

³Fa matahotra aho, fandrao ho simba hiala amin’ny fahatsoram-po sy ny fahadiovana amin’i Kristy ny sainareo, tahaka ny namitahan’ny menarana an’i Eva tamin’ny hafetseny.

⁴Fa raha misy olona tonga ka mitory Jesosy hafa izay tsy notorinay, na mandray fanahy hafa na Filazantsara hafa noho izay noraisinareo, dia mandefitra amin’izany ianareo.

⁵Fa ataoko fa tsy misy mahalatsa-danja ahy noho ireo Apostoly malaza ireo.

⁶Fa na dia olona tsy nampianarina handaha-teny aza aho dia tsy mba tahaka izany aho amin’ny fahalalana; fa tamin’ny zavatra rehetra dia efa nasehonay marimarina tamin’ny olona rehetra izany.

⁷Diso va aho raha nanetry tena mba hisandratanareo ka nitory maimaimpoana ny Filazantsaran’Andriamanitra taminareo?

⁸Namabo ny fiangonana[2] sasany aho ka nandray karama hanompoako anareo.

⁹Fa raha teo aminareo aho ka azon’ny tsy fahampiana dia tsy mba nahavaky tratra olona aho; fa ny rahalahy izay tonga avy tany Makedonia no nanome ahy izay nilaiko; ary tamin’ny zavatra rehetra dia nitandrina tsara izay tsy hahavaky tratra anareo aho sady mbola hitandrina izany ihany.

¹⁰Raha ato anatiko koa ny fahamarinan’i Kristy dia tsy hisy hahafoana izany reharehako izany any amin’ny tany Akaia.

¹¹Nahoana? Satria tsy tiako va ianareo? Andriamanitra no mahalala.

¹²Fa izay ataoko no mbola hataoko ihany mba tsy hahafahan’ireo mitady antony hitovizany aminay.

¹³Fa apostoly sandoka izy ireny, mpiasa mamitaka, ka mampiova ny endriny ho tahaka ny apostolin’i Kristy.

¹⁴Ary tsy mahagaga izany, fa i Satana aza dia mampiova ny endriny ho tahaka ny anjelin’ny mazava.

¹⁵Koa tsy dia zava-dehibe ho an’ny mpanompony ny mampiova ny endriny ho tahaka ny mpanompon’ny fahamarinana. Nefa ny fiafaran’izy ireo dia ho araka ny asany ihany.

¹⁶Averiko indray: Aza misy milaza ahy ho adala; nefa, na dia misy milaza izany aza, raiso toy ny adala aho mba hireharehako kely koa.

¹⁷Izao lazaiko izao dia tsy lazaiko araka ny Tompo fa toa amin’ny fahadalana amin’izao fireharehana feno fahatokiana izao.

¹⁸Koa satria maro no mirehareha araka ny nofo dia mba hirehareha koa aho.

¹⁹Fa sitrakareo ny mandefitra amin’ny adala satria hendry angaha ianareo!

²⁰Fa hay! Mandefitra ihany ianareo raha misy manandevo anareo, raha misy mandany ny fanananareo, raha misy misambotra anareo, raha misy manao fihetsika mihantsy anareo, raha misy mamely ny tavanareo.

²¹Manala baraka tena aho ka toa manaiky fa nalemy izahay! Fa amin’izay mahasahy ny olona dia mba sahy koa aho; eny, miteny toy ny adala aho amin’izany.

²²Hebreo va izy? Izaho koa. Israelita va izy? Izaho koa. Taranak’i Abrahama va izy? Izaho koa.

²³Mpanompon’i Kristy* va izy? Miteny toy ny olona very saina aho, izaho koa dia mpanompon’i Kristy mihoatra noho izy ireo: Amin’ny fisasarana, manan-tombo; amin’ny tranomaizina, matetika kokoa; amin’ny kapoka be, efa izay tsy izy; misedra ny fahafatesana matetika.

²⁴Indimy aho no nokapohin’ny Jiosy*, inefapolo latsaka iray avy.

²⁵Intelo nokapohina tamin’ny hazo aho, indray maka notoraham-bato, intelo no vaky sambo, indray andro sy indray alina no nitoetra tao amin’ny lalina,

²⁶nandeha matetika aho, saika nahita loza tamin’ny ony, saika nahita loza tamin’ny jiolahy, saika nahita loza tamin’ny tompon-tany namako, saika nahita loza tamin’ny Jentilisa*, saika nahita loza tao amin’ny tanàna, saika nahita loza tany an-tany efitra, saika nahita loza tany amin’ny ranomasina, saika nahita loza tamin’ny rahalahy sandoka,

²⁷tamin’ny fisasarana sy ny fikelezana aina, tamin’ny tsy fahitan-tory matetika, tamin’ny hanoanana sy ny hetaheta, tamin’ny fifadian-kanina matetika, tamin’ny hatsiaka sy ny fitanjahana.

²⁸Afa-tsy ireo zavatra ivelany dia mbola misy koa izay mahazo ahy isanandro, dia ny fiahiana ny fiangonana[3] rehetra.

²⁹Iza no malemy ka tsy malemy aho? Iza no mahazo fanafintohinana ka tsy mirehitra anaty aho?

³⁰Raha tsy maintsy mirehareha aho dia izay momba ny fahalemeko no hataoko rehareha.

³¹Andriamanitra, Rain’i Jesosy Tompo, izay isaorana mandrakizay, mahalala fa tsy mandainga aho.

³²Tany Damaskosy ny governora notendren’i Areta mpanjaka dia nampiambina ny tanàna Damaskosy mba hisambotra ahy;

³³fa avy teo amin’ny varavarankely eo amin’ny manda no nampidinana ahy tamin’ny sobika ka afa-nandositra ny tanany aho.