Read La Bible en Malgache 2Korintiana 2 Bible Online

2Korintiana 2 - La Bible en Malgache bible

2Korintiana 2

¹Ny sitrapoko dia ny tsy hiverenako any aminareo indray amin’alahelo.

²Fa raha mampalahelo anareo aho, iza moa no mampifaly ahy, afa-tsy ilay nampalaheloviko ihany?

³Ary nanoratra izany indrindra aho, fandrao rehefa tonga aho dia hahazo alahelo amin’izay tokony hifaliako, satria matoky anareo rehetra aho, fa ny fifaliako dia anareo rehetra koa.

⁴Fa tamin’ny haben’ny fahoriana sy ny alahelon’ny foko no nanoratako taminareo tamin’ny ranomaso be, tsy ny hampalahelovana anareo fa ny mba hahafantaranareo ny fitiavana izay itiavako anareo manokana.

⁵Fa raha nisy nahatonga alahelo dia tsy izaho no nampalaheloviny fa ianareo rehetra, nefa mba tsy ho tafahoatra loatra ny teniko, dia ny sasany aminareo.

⁶Ampy ho an’izany olona izany ny fampijaliana nataon’ny maro,

⁷koa aleo kosa ianareo mamela heloka sy mampifaly azy, fandrao dia kivin’ny alahelo tafahoatra izany olona izany.

⁸Koa mananatra anareo aho mba hekenareo ny handray azy tsara amin’ny fitiavana.

⁹Fa izany koa no nanoratako mba ho fantatro izay toetranareo, na mankatò amin’ny zavatra rehetra ianareo, na tsia.

¹⁰Fa izay avelanareo heloka dia mba avelako heloka koa; ary izaho anefa, raha nisy heloka navelako dia noho ny aminareo no namelako azy teo imason’i Kristy*,

¹¹fandrao ho resin’ny fitak’i Satana isika, fa fantatsika ny teti-dratsiny.

¹²Ary rehefa tonga tany Troasy hitory ny Filazantsaran’i Kristy* aho ka novohana varavarana ao amin’ny Tompo

¹³dia tsy tafandry mandry aho satria tsy nahita an’i Titosy rahalahiko; ary nanao veloma ny olona aho, dia niala teo nankany Makedonia.

¹⁴Fa isaorana anie Andriamanitra izay mitondra anay mandrakariva ao amin’i Kristy* toy ny fanaon’izay avy nandresy ka ampisehoany ny hanitry ny fahalalana Azy eny tontolo eny izahay.

¹⁵Fa hanitr’i Kristy ho an’Andriamanitra izahay amin’izay hovonjena sy izay ho very:

¹⁶Amin’ny sasany dia hanitra avy amin’ny fahafatesana ho amin’ny fahafatesana; fa amin’ny sasany kosa dia hanitra avy amin’ny fiainana ho amin’ny fiainana. Koa iza moa no antonona ho amin’izany zavatra izany?

¹⁷Fa tsy mba toy ny maro izay manatsatso ny tenin’Andriamanitra hahazoam-bola izahay; fa toy ny amin’ny fahadiovam-po kosa, dia avy amin’Andriamanitra, sady eo anatrehan’Andriamanitra no itenenanay ao amin’i Kristy.