Read La Bible en Malgache 2Korintiana 3 Bible Online

2Korintiana 3 - La Bible en Malgache bible

2Korintiana 3

¹Moa midera tena indray va izahay? Sa toy ny sasany ka mila epistily filazan-tsoa anay ho anareo, na avy aminareo?

²Ianareo no epistilinay voasoratra ato am-ponay sady fantatra sy vakin’ny olona rehetra;

³eny, aseho ho epistilin’i Kristy* izay entinay ianareo, tsy nosoratana tamin’ny ranomainty anefa fa tamin’ny Fanahin’Andriamanitra velona, tsy teo amin’izay tena vato fisaka anefa fa teo amin’izay vato fisaka nofo, dia ny fo.

⁴Ary manana izany fahatokiana izany eo anatrehan’Andriamanitra izahay amin’ny alalan’i Kristy.

⁵Kanefa tsy mihambo hanana fahafahana avy aminay izahay hihevitra na inona na inona avy amin’ny tenanay; fa ny fahafahanay dia avy amin’Andriamanitra

⁶izay efa nahafahanay koa ho tonga mpanompon’ny fanekena vaovao, tsy amin’ny soratra anefa fa amin’ny Fanahy; ny soratra dia mahafaty, fa ny Fanahy no mahavelona.

⁷Fa raha ny asa fanompoan’ny fahafatesana aza, dia ilay voasoratra teo amin’ny vato, no nisy voninahitra ka tsy nahabanjina ny tavan’i Mosesy ny Zanak’Israely noho ny voninahitry ny tavany izay nandalo ihany,

⁸tsy mainka hisy voninahitra va ny fanompoan’ny Fanahy?

⁹Fa raha nisy voninahitra ny fanompoana nitondra ny fanamelohana dia vao mainka hanana tombom-boninahitra ny fanompoana mitondra ny fahamarinana.

¹⁰Ary izay nisy voninahitra teo aza dia tsy manana voninahitra fotsiny amin’izao raha ampitahaina amin’ny voninahitra tonga lafatra.

¹¹Fa raha ny mandalo aza no nisy voninahitra, mainka fa ny mitoetra dia ho rakotra voninahitra kokoa.

¹²Koa amin’izany, satria manana izany fanantenana izany izahay, dia feno fahasahiana tokoa;

¹³tsy tahaka an’i Mosesy izay nanarona ny tavany tamin’ny fisalobonana mba tsy hibanjinan’ny Zanak’Israely ny fiafaran’izany voninahitra nihalevona izany.

¹⁴Fa efa donto ny sainy; fa ambaraka androany dia mbola tsy nesorina ihany izany fisalobonana izany, raha vakina ny tenin’ny fanekena taloha, satria ao amin’i Kristy ihany no anesorana izany.

¹⁵Fa misy fisalobonana manarona ny fony ambaraka androany, rehefa vakina ny tenin’i Mosesy.

¹⁶Kanefa rehefa miverina amin’ny Tompo izy dia hesorina ihany ny fisalobonana.

¹⁷Ary ny Tompo izany Fanahy izany; ary izay itoeran’ny Fanahin’ny Tompo no itoeran’ny fahafahana.

¹⁸Fa isika rehetra kosa dia amin’ny tava tsy misarona no ibanjinantsika ny voninahitry ny Tompo, tahaka ny amin’ny fitaratra, ka ovany hitovy endrika Aminy, avy amin’ny voninahitra ho amin’ny voninahitra, toy ny avy amin’ny Tompo, dia ny Fanahy.