Read La Bible en Malgache 2Korintiana 6 Bible Online

2Korintiana 6 - La Bible en Malgache bible

2Korintiana 6

¹Koa satria mpiara-miasa Aminy izahay dia mangataka aminareo koa mba tsy hataonareo tsinontsinona ny fahasoavan’Andriamanitra izay noraisinareo taminay.

²Fa hoy Izy: «Tamin’ny taona fankasitrahana no nihainoako anao ary tamin’ny andro famonjena no namonjeko anao» (Isa 49.8). Indro, ankehitriny no andro fankasitrahana; indro, ankehitriny no andro famonjena.

³Tsy manao izay mahatafintohina izahay na amin’inona na amin’inona, mba tsy hanomezana tsiny ny fanompoana;

⁴fa amin’ny zavatra rehetra dia mampiseho ny tenanay ho mpanompon’Andriamanitra izahay ka manana faharetana tokoa amin’ny fahoriana, amin’ny fahaterena, amin’ny fahantrana,

⁵amin’ny kapoka, amin’ny fatorana, amin’ny tabataba, amin’ny fisasarana, amin’ny tsy fahitan-tory, amin’ny fifadian-kanina,

⁶amin’ny fahadiovana, amin’ny fahalalana, amin’ny fahari-po, amin’ny fahamoram-panahy, amin’ny Fanahy Masina, amin’ny fitiavana tsy mihatsaravelatsihy,

⁷amin’ny teny fahamarinana, amin’ny herin’Andriamanitra, amin’ny fiadian’ny fahamarinana, na amin’ny ankavanana na amin’ny ankavia,

⁸amin’ny voninahitra sy ny fahafaham-boninahitra, amin’ny laza ratsy sy ny laza soa; tahaka ny mpamitaka nefa marina ihany;

⁹tahaka ny tsy fantatra nefa fantatra tsara ihany; tahaka ny efa ho faty nefa indro, velona ihany; tahaka ny faizina nefa tsy vonoina;

¹⁰tahaka ny ampalahelovina nefa faly mandrakariva; tahaka ny mahantra nefa mampanankarena ny maro; tahaka ny tsy manana na dia kely akory aza nefa manana ny zavatra rehetra.

¹¹Ry Korintiana, miteny tsotra aminareo izahay, malalaka ny fonay.

¹²Tsy tery fo aminareo izahay fa ianareo no manidy ny fonareo.

¹³Ary ho setriny mifandanja amin’izany, miteny toy ny amin’ny zanako aho, aoka mba halalaka kosa ny fonareo.

¹⁴Aza mety hasiana zioga tsy antonona anareo hikambanana amin’ny tsy mino. Fa inona no iraisan’ny fahamarinana sy ny fahotana? Inona no iombonan’ny mazava sy ny maizina?

¹⁵Inona no ifanarahan’i Kristy* sy i Beliala? Inona no ifandraisan’ny mino sy ny tsy mino?

¹⁶Ary inona no ikambanan’ny tempolin’Andriamanitra amin’ny sampy? Fa isika no tempolin’Andriamanitra velona, araka ny nataon’Andriamanitra hoe: «Honina eo aminy Aho sy handeha eo aminy; ary ho Andriamaniny Aho, ary ho oloko izy» (Lev 26.11-12).

¹⁷«Koa mialà eo aminy ianareo ka misaraha aminy, hoy NY TOMPO; aza manendry izay zavatra tsy madio, ary Izaho handray anareo.

¹⁸Ary ho Rainareo Aho, ary ho zanako lahy sy ho zanako vavy ianareo, hoy NY TOMPO Tsitoha» (Isa 52.11-12).