Read La Bible en Malgache 2Korintiana 8 Bible Online

2Korintiana 8 - La Bible en Malgache bible

2Korintiana 8

¹Ampahafantarinay anareo, ry rahalahy, ny fahasoavan’Andriamanitra izay nomena tao amin’ny fiangonana any Makedonia;

²fa tamin’ny fahoriana be izay nizahan-toetra azy no nitomboan’ny hafaliany, ary ny hamafin’ny fahantrany no nampitombo ny harenan’ny fahalalahan-tanany.

³Koa vavolombelona aho fa araka ny zakany, eny, mihoatra noho ny zakany aza, sady araka ny sitrapony ihany, no nanomezany,

⁴sady nangataka mafy taminay koa izy mba havelanay hikambana amin’izany fanompoana ho an’ny olona masina izany;

⁵ary tsy araka ny nantenainay, fa ny tenany no natolony ho an’ny Tompo aloha, dia izay vao ho anay koa noho ny sitrapon’Andriamanitra.

⁶Koa dia nangataka an’i Titosy izahay mba hamita izany asa fanasoavana izany eo aminareo koa, araka ny efa nanombohany azy teo aloha.

⁷Nefa noho ny fanananareo ny feno amin’ny lafiny rehetra, na amin’ny finoana, na amin’ny teny, na amin’ny fahalalana, na amin’ny fahazotoana rehetra, na amin’ny fitiavanareo anay, dia aoka hanana ny fitiavana feno koa ianareo amin’izao asa fanasoavana izao.

⁸Tsy milaza izany ho didy aho fa noho ny zotom-pon’ny sasany dia te hizaha toetra ny fahamarinan’ny fitiavanareo.

⁹Fa fantatrareo ny fahasoavan’i Jesosy Kristy* Tompontsika, fa na dia nanankarena aza Izy, dia tonga mahantra noho ny aminareo, mba hampanan-karena anareo ny fahantrany.

¹⁰Ary ambarako izay hevitro ny amin’izany, fa mahatsara anareo izany, satria ianareo no nanomboka nanao fanangonana, ary ianareo rahateo no nanapa-kevitra ny hanao izany talohan’ny hafa, hatramin’ny taon-dasa.

¹¹Tanteraho hatramin’ny farany ary izany, koa tahaka ny fahazotoanareo tamin’ny famolavolana ny asa dia aoka koa ho tahaka izany ny fanatanterahana azy, araka izay anananareo.

¹²Fa raha misy ny fahazotoana dia araka izay ananana no ankasitrahana ny mpanome fa tsy araka izay tsy ananana.

¹³Kanefa tsy ny fanamaivanana ny fahorian’ny sasany no hanavesatra anareo fa ny mba hisian’ny fitoviana;

¹⁴koa amin’izao ankehitriny izao, ny haben’ny harenanareo no hahafaka ny fahantran’ireo ary ny haben’ny haren’ireo kosa no hahafaka ny fahantranareo mba hampisy fitoviana,

¹⁵araka ny voasoratra hoe: «Ny nanangona be dia tsy nanana amby ary ny nanangona kely dia tsy nanana ny tsy ampy» (Eks 16.18).

¹⁶Fa isaorana anie Andriamanitra izay nanome izany fahazotoana izany koa ho ao am-pon’i Titosy ho anareo.

¹⁷Fa nanaiky ny fangatahanay izy sady efa nazoto rahateo izy, koa an-tsitrapo no nandehanany nankany aminareo.

¹⁸Ary ilay rahalahy izay re laza any amin’ny fiangonana[1] rehetra noho ny amin’ny Filazantsara, io no nirahinay hiaraka aminy;

¹⁹ary tsy izany ihany fa efa notendren’ny fiangonana koa izy ho namanay hiara-mandeha aminay hitondra izao fanomezana izao ka ataonay ho naman’ny asa fanompoanay izany, ho voninahitry ny Tompo sy ho vavolombelon’ny fahazotoanay.

²⁰Ary mitandrina izahay mba tsy hisy hanome tsiny anay amin’izao harena be voangona sy tantananay izao;

²¹koa mikatsaka ny hanao ny tsara izahay, tsy eo imason’ny Tompo ihany fa eny imason’ny olona koa.

²²Ary nirahinay niaraka tamin’ireo ilay rahalahinay izay hitanay matetika fa mazoto amin’ny zavatra maro; ary ankehitriny dia vao mainka mazoto kokoa aza izy noho ny haben’ny fahatokiany anareo.

²³Raha ny amin’i Titosy dia namako izy sady mpiara-miasa amiko eo aminareo; ary ireo rahalahinay dia iraky ny fiangonana izy ireo sady voninahitr’i Kristy.

²⁴Koa amin’izany dia asehoy aminy eo imason’ny fiangonana ny famantarana mahamarina ny fitiavanareo sy ny reharehanay ny aminareo.