Read La Bible en Malgache Galatiana 1 Bible Online

Galatiana 1 - La Bible en Malgache bible

Galatiana 1

¹I Paoly Apostoly, tsy avy tamin’olona, na tamin’ny alalan’olona, fa tamin’ny alalan’i Jesosy Kristy* sy Andriamanitra Ray izay nanangana Azy tamin’ny maty,

²mbamin’ny rahalahy rehetra izay ato amiko, no mamangy ny fiangonana[1] any Galatia.

³Ho aminareo anie ny fahasoavana sy ny fiadanana avy amin’Andriamanitra Ray sy Jesosy Kristy Tompontsika

⁴izay nanolotra ny tenany noho ny fahotantsika mba hanafahany antsika amin’izao vanim-potoana ratsy ankehitriny izao, araka ny sitrapon’Andriamanitra Raintsika.

⁵Ho Azy anie ny voninahitra mandrakizay mandrakizay. Amena*!

⁶Gaga aho raha mifindra haingana toy izao ianareo hiala amin’izay efa niantso anareo tamin’ny fahasoavan’i Kristy* ho amin’ny Filazantsara hafa

⁷izay tsy filazantsara akory, saingy misy ny manakorontana anareo ka ta hanova ny Filazantsaran’i Kristy.

⁸Fa na izahay, na anjely avy any an-danitra aza, no mitory filazantsara hafa aminareo afa-tsy izay efa notorinay taminareo dia aoka ho voaozona izy.

⁹Araka ny efa voalazanay no lazaiko indray ankehitriny: Raha misy olona mitory filazantsara hafa aminareo, afa-tsy izay efa noraisinareo, dia aoka ho voaozona izy.

¹⁰Ary ankehitriny, olona va no ilàko sitraka sa Andriamanitra? Moa mila sitraka amin’olona va aho? Raha mbola mila sitraka amin’olona aho dia tsy mpanompon’i Kristy.

¹¹Fa ampahafantariko anareo, ry rahalahy, fa ny amin’ny Filazantsara izay notoriko, dia tsy araka ny fanaon’ny olona,

¹²satria sady tsy nandray azy tamin’olona aho no tsy mba nampianarina, fa tamin’ny fanambaràn’i Jesosy Kristy* ihany.

¹³Efa renareo ny toetrako fahiny nanoloana ny fivavahan’ny Jiosy*; nanenjika mafy ny fiangonan’Andriamanitra aho ka nandrava azy;

¹⁴nandroso tamin’ny fivavahan’ny Jiosy koa, mihoatra noho ny maro indray mihira amiko eo amin’ny fireneko, sady tena fatra-pitana ny fampianarana voatolotry ny razako.

¹⁵Fa rehefa sitrak’Andriamanitra, izay nanokana ahy hatrany an-kibon’Ineny sy niantso ahy tamin’ny fahasoavany,

¹⁶ny nampiseho ny Zanany tato anatiko, mba hitoriako Azy any amin’ny Jentilisa*, niaraka tamin’izay dia tsy naka saina tamin’ny nofo aman-dra aho

¹⁷ary tsy niakatra tany Jerosalema ho any amin’izay apostoly talohako aho, fa lasa nankany Arabia dia niverina ho any Damaskosy indray.

¹⁸Nony afaka telo taona dia niakatra tany Jerosalema mba hifankahalala amin’i Kefasy aho ka nitoetra tao aminy nandritra ny dimy amby folo andro.

¹⁹Nefa ny apostoly sasany dia tsy nisy hitako afa-tsy i Jakoba, rahalahin’ny Tompo.

²⁰Ary indro, eo anatrehan’Andriamanitra izay zavatra soratako aminareo fa tsy mandainga aho.

²¹Rehefa afaka izany dia tonga tany amin’ny tany Siria sy Kilikia aho;

²²ary tsy mbola fantatry ny fiangonana[2] any Jodia*, izay ao amin’i Kristy, ny tarehiko.

²³Fa nandre ihany izy ireo hoe: Ilay mpanenjika antsika fahiny, indro izy ankehitriny, mitory ny finoana izay noravany fahiny.

²⁴Dia nankalaza an’Andriamanitra noho ny amiko izy ireo.