Read La Bible en Malgache Galatiana 3 Bible Online

Galatiana 3 - La Bible en Malgache bible

Galatiana 3

¹Ry Galatiana adala, iza no namosavy anareo? Teo imasonareo indrindra anefa no nanehoana marimarina an’i Jesosy Kristy* voahombo tamin’ny hazofijaliana.

²Izao ihany no tiako ho fantatra avy aminareo: Moa ny asan’ny lalàna va no nandraisanareo ny Fanahy, sa ny nandrenesanareo ny hafatry ny finoana?

³Adala toy izany va ianareo? Rehefa nanomboka tamin’ny Fanahy va ianareo dia hamarana amin’ny nofo ankehitriny?

⁴Moa va niaretanareo foana izany zavatra rehetra izany, raha dia zava-poana tokoa izany?

⁵Ary Izay manome anareo ny Fanahy sy mahavita asa lehibe eo aminareo, moa avy amin’ny asan’ny lalàna va no anaovany izany, sa avy amin’ny fandrenesana ny hafatry ny finoana?

⁶Koa tahaka an’i «Abrahama, nino an’Andriamanitra ka nisaina ho fahamarinany izany» (Gen 15.6),

⁷dia fantaro fa izay amin’ny finoana no zanak’i Abrahama.

⁸Ary satria hitan’ny Soratra Masina rahateo fa amin’ny finoana no anamarinan’Andriamanitra ny Jentilisa*, dia nitory ny Filazantsara tamin’i Abrahama koa izy ka niteny hoe: «Aminao no hitahiana ny firenena rehetra» (Gen 12.3);

⁹koa izay manana finoana no tahina miaraka amin’i Abrahama, ilay mpino.

¹⁰Izay rehetra avy amin’ny asan’ny lalàna dia eo ambanin’ny fanozonana; fa efa voasoratra hoe: «Voaozona izay rehetra tsy maharitra amin’ny fanatanterahana ny zavatra rehetra voasoratra ao amin’ny bokin’ny lalàna» (Deo 27.26).

¹¹Hita marimarina fa tsy misy olona hamarinina eo anatrehan’Andriamanitra amin’ny lalàna; fa «ny marina amin’ny finoana no ho velona» (Hab 2.4).

¹²Ary ny lalàna dia tsy avy amin’ny finoana fa «izay mahatandrina izany no ho velona aminy» (Lev 18.5).

¹³Kristy* no nanavotra antsika tamin’ny ozon’ny lalàna satria tonga voaozona hamonjy antsika Izy; fa voasoratra hoe: «Voaozona izay rehetra mihantona amin’ny hazo» (Deo 21.23),

¹⁴mba ho tonga amin’ny Jentilisa ny fitahiana an’i Abrahama ao amin’i Kristy Jesosy, ary mba horaisintsika amin’ny finoana ny teny fikasana ny amin’ny Fanahy.

¹⁵Ry rahalahy! Miteny araka ny fanaon’ny olona aho, fa na dia ny didim-pananana ataon’olona aza, rehefa vita ara-dalàna, dia tsy fanao ny manatsoaka na manampy azy.

¹⁶Tamin’i Abrahama sy ny taranany no nilazana ny teny fikasana. Tsy lazainy hoe: Ho an’ireo taranaka, toy ny milaza ny maro, fa toy ny milaza ny iray, «ary ho an’ny taranakao» (Gen 22.18), dia i Kristy* izany.

¹⁷Ary izao no lazaiko: Ny didim-pananana izay nataon’Andriamanitra mafy orina fahiny dia tsy foanan’ny lalàna, izay vao telopolo sy efajato taona tatỳ aoriana, fa manjary hanafoana ny teny fikasana io raha izany.

¹⁸Raha avy amin’ny lalàna ny lova dia tsy avy amin’ny teny fikasana intsony; nefa tamin’i Abrahama dia ny teny fikasana no nanomezan’Andriamanitra azy.

¹⁹Nahoana moa no misy ny lalàna? Nomena ho fanampiny mba hisehoan’ny fahadisoana ambara-piavin’ny taranaka izay nomena ny teny fikasana izany; anjely no nandahatra izany teo an-tanan’ny mpanalalana.

²⁰Ary ny mpanalalana dia tsy an’olon-tokana, fa Andriamanitra kosa dia tokana.

²¹Moa manohitra ny teny fikasan’Andriamanitra va ny lalàna? Sanatria izany! Raha nisy lalàna mahavelona nomena dia avy tamin’ny lalàna tokoa ny fahamarinana,

²²satria ny Soratra Masina dia efa nanidy azy rehetra tao amin’ny fahotana, mba homena ny Mino noho ny finoana an’i Jesosy Kristy* ny teny fikasana.

²³Fa fony tsy mbola tonga ny finoana dia voambina tao ambanin’ny lalàna isika ka voahidy mandra-pahatongan’ny finoana izay efa haseho atỳ aoriana.

²⁴Noho izany ary dia mpitaiza antsika ho amin’i Kristy ny lalàna, mba hohamarinina noho ny finoana isika.

²⁵Rehefa tonga kosa ny finoana dia tsy eo ambany fifehezan’izay mpitaiza intsony isika.

²⁶Zanak’Andriamanitra amin’ny finoana an’i Kristy Jesosy ianareo rehetra.

²⁷Koa na iza na iza ianareo no natao batisa ho an’i Kristy dia nitafy an’i Kristy.

²⁸Tsy misy intsony ny Jiosy* sy Grika, ny andevo sy olona afaka, ny lahy sy vavy; fa iray ihany ianareo rehetra ao amin’i Kristy Jesosy.

²⁹Fa raha an’i Kristy ianareo dia taranak’i Abrahama, koa araka ny teny fikasana, dia mpandova.