Read La Bible en Malgache Galatiana 4 Bible Online

Galatiana 4 - La Bible en Malgache bible

Galatiana 4

¹Fa hoy aho: Raha mbola zaza ny mpandova dia tsy hafa noho ny andevo izy na dia tompon’ny zavatra rehetra aza,

²satria fehezin’ny mpitaiza azy sy mpitantana ao an-trano izy mandra-pahatongan’ny fotoana voatendrin’ny rainy.

³Tahaka izany koa isika, fony mbola zaza, dia nandevozin’ny abidim-pianaran’izao tontolo izao;

⁴fa rehefa tonga kosa ny fotoanandro dia nirahin’Andriamanitra ny Zanany, nateraky ny vehivavy, nateraka tao ambanin’ny lalàna,

⁵hanavotany izay ambanin’ny lalàna, mba handraisantsika ny maha zanaka.

⁶Koa satria zanaka ianareo dia nirahin’Andriamanitra ho ato am-pontsika ny Fanahin’ny Zanany izay miantso hoe: Aba! Ray ô!

⁷Koa tsy andevo intsony ianao fa zanaka; ary raha zanaka dia mpandova koa, noho ny ataon’Andriamanitra.

⁸Taloha, fony mbola tsy nahalala an’Andriamanitra ianareo dia nanompo izay andriamanitra tsy izy.

⁹Ankehitriny kosa, mahalala an’Andriamanitra ianareo, kanefa tsy izany, fa Izy no mahalala anareo. Koa nahoana ianareo no miverina indray amin’ny fanompoana ny abidim-pianarana malemy sady tsy misy dikany?

¹⁰Andro, volana sy fotoana ary taona no tandremanareo fatratra.

¹¹Matahotra ny aminareo aho, fandrao dia nisasatra foana taminareo.

¹²Ry rahalahy! Mangataka aminareo aho: Aoka ho tonga tahaka ahy ianareo, fa izaho koa dia efa tonga tahaka anareo. Tsy hoe nanao izay tsy marina tamiko akory ianareo;

¹³fantatrareo aza fa noho ny aretina no nitoriako ny Filazantsara taminareo tamin’ilay voalohany.

¹⁴Tsy nalaim-panahy hanao tsinontsinona na handa ahy noho ny aretiko ianareo; fa nandray ahy tahaka ny mandray anjelin’Andriamanitra*; eny, tahaka an’i Kristy* Jesosy aza.

¹⁵Aiza izao ilay fahasambaranareo? Satria vavolombelonareo aho fa raha azonareo natao, na dia ny masonareo aza dia ho nesorinareo ka nomenareo ahy.

¹⁶Efa tonga fahavalonareo va aho satria milaza ny marina aminareo?

¹⁷Ny hafanam-po nasehon’ireo taminareo dia tsy tsara; fa hampisaraka anareo aminay izy mba hiraiketan’ny fonareo aminy.

¹⁸Fa tsara raha mazoto amin’ny tsara mandrakariva, fa tsy rehefa eo aminareo ihany aho,

¹⁹ry zanako, dia ianareo izay ananako faharariam-piterahana indray amin’ny fiterahana mandra-pahazoan’i Kristy endrika ao anatinareo.

²⁰Te ho tonga eo aminareo aho ankehitriny ka hanova ny feoko, fa sahiran-tsaina ny aminareo aho.

²¹Milazà amiko ianareo izay te ho ambanin’ny lalàna: Tsy renareo va ny lalàna?

²²Fa voasoratra hoe: I Abrahama dia nanana zanaka roa lahy, ny iray dia tamin’ny andevovavy, ary ny iray dia tamin’ny vehivavy afaka.

²³Kanefa ilay tamin’ny andevovavy dia nateraka araka ny nofo; fa ilay tamin’ny vehivavy afaka kosa dia nateraka tamin’ny teny fikasana.

²⁴Fanoharana izany. Izy roa vavy ireo dia fanekena roa: Ny iray dia avy tamin’ny tendrombohitra Sinay ka miteraka fanandevozana. I Hagara izany.

²⁵Ny hoe Hagara mantsy dia tendrombohitra Sinay any Arabia ka mifanandrify amin’i Jerosalema ankehitriny satria andevo izy mbamin’ny zanany.

²⁶Fa Jerosalema any ambony kosa, izay renintsika, dia olona afaka.

²⁷Voasoratra mantsy hoe: «Mifalia, Ramomba, izay tsy mba miteraka; miantsoantsoa sy manaova hiakam-pifaliana ianao izay tsy mbola nihetsi-jaza; fa ny zanaky ny mpitondratena dia maro noho ny an’ny manambady» (Isa 54.1).

²⁸Fa isika, ry rahalahy, dia zanaky ny teny fikasana tahaka an’Isaka.

²⁹Kanefa tahaka ny tamin’izany andro izany, ilay teraka araka ny nofo dia nanenjika ilay araka ny Fanahy. Tahaka izany koa ankehitriny.

³⁰Nefa ahoana no lazain’ny Soratra Masina? «Roahy io andevovavy io sy ny zanany lahy; fa ny zanaky ny andevo dia tsy hiray lova amin’ny zanaky ny vehivavy afaka» (Gen 21.10).

³¹Noho izany, ry rahalahy, tsy zanak’andevovavy isika fa zanaky ny vehivavy afaka.