Read La Bible en Malgache Galatiana 5 Bible Online

Galatiana 5 - La Bible en Malgache bible

Galatiana 5

¹Ho amin’ny fahafahana no nanafahan’i Kristy* antsika; koa miorena tsara fa aza mety hohazonin’ny ziogan’ny fanandevozana indray.

²Indro, izaho Paoly milaza aminareo fa raha mety hoforana ianareo dia tsy hahasoa anareo na dia kely akory aza Kristy.

³Ambarako marina amin’ny olona rehetra manaiky hoforana indray fa mpitrosa tsy maintsy mankatò ny lalàna rehetra izy.

⁴Tafasaraka amin’i Kristy ianareo na iza na iza mitady hohamarinina amin’ny lalàna. Efa lavo niala tamin’ny fahasoavana ianareo;

⁵fa izahay kosa, noho ny asan’ny Fanahy, amin’ny alalan’ny finoana no iandrasanay mafy ny fanantenana ny fanamarinana anay.

⁶Fa ao amin’i Kristy Jesosy dia samy tsy mahasoa na ny famorana na ny tsy famorana fa ny finoana miasa amin’ny fitiavana.

⁷Nihazakazaka tsara ianareo. Iza no nisakana anareo tsy hanaiky ny marina?

⁸Tsy avy tamin’Ilay niantso anareo izany fandresen-dahatra izany.

⁹Ny masirasira kely dia mampitombo ny koba manontolo.

¹⁰Matoky anareo ao amin’ny Tompo aho, fa tsy hisaina zavatra hafa noho izay sainiko ianareo. Ilay mampikorontana anareo no hiharan’ny fanamelohana, na iza izy na iza.

¹¹Fa raha mbola hitory ny famorana ihany aho, ry rahalahy, inona indray no mbola hanenjehana ahy? Raha izany dia ho foana ny fahatafintohinana noho ny hazofijaliana.

¹²Enga anie ka hanamelo-tena izay mampikorontana anareo.

¹³Efa nantsoina ho amin’ny fahafahana ianareo, ry rahalahy; kanefa aoka tsy hoentina hanaraka ny nofo izany fahafahana izany. Mifanompoa amin’ny fitiavana

¹⁴fa tanteraka amin’ny teny iray ihany ny lalàna rehetra, dia izao: «Tiava ny namanao tahaka ny tenanao» (Lev 19.18).

¹⁵Fa raha mifandramatra sy mifampihinana ianareo, aoka tsy hifandringana!

¹⁶Hoy kosa aho: Mandehana araka ny Fanahy dia tsy hahatanteraka ny filan’ny nofo ianareo.

¹⁷Manana filana manohitra ny Fanahy mantsy ny nofo, ary manohitra ny nofo ny Fanahy. Mifanohitra izy ireo mba tsy hahazoanareo manao izay zavatra tianareo hatao.

¹⁸Raha tarihin’ny Fanahy ianareo dia tsy mba ambanin’ny lalàna.

¹⁹Fa miharihary ny asan’ny nofo, dia izao: Fijangajangana, fahalotoana, fijejojejoana,

²⁰fanompoan-tsampy, fitahirizana ody ratsy, fandrafiana, fifandirana, adilahy, fialonana, lolompo, fifampiandaniana, fitsitokotokoana,

²¹fitsiriritana, fahamamoana, filalaovan-dratsy sy ny toy izany, izay ampitandremako anareo rahateo, tahaka ny nampitandremako anareo fahiny koa, fa tsy handova ny fanjakan’Andriamanitra izay manao izany.

²²Ny vokatry ny Fanahy kosa dia fitiavana, fifaliana, fiadanana, fahari-po, fahamoram-panahy, fanaovan-tsoa, finoana,

²³fahalemem-panahy, fifehezan-tena. Tsy misy lalàna manohitra izany.

²⁴Fa izay an’i Kristy* Jesosy dia efa nanombo ny nofony mbamin’ny faniriany sy ny filany teo amin’ny hazofijaliana.

²⁵Raha velona amin’ny Fanahy isika dia aoka handeha araka ny Fanahy.

²⁶Aoka isika tsy hieboebo foana ka hifampihantsy sy hifampialona.