Read La Bible en Malgache Efesiana 2 Bible Online

Efesiana 2 - La Bible en Malgache bible

Efesiana 2

¹Ianareo dia maty noho ny fahadisoanareo sy ny fahotanareo

²izay niainanareo fahiny, araka ny fomban’izao tontolo izao, araka ny mpanapaka ny fanjakana eny amin’ny rivotra, dia ny fanahy izay miasa ankehitriny ao anatin’ny tsy mpankato.

³Teo amin’ireo no nitondrantsika rehetra tena koa fahiny tamin’ny filan’ny nofontsika ka nanaovantsika ny danin’ny nofo sy ny saina; ary araka ny toetsika dia voatendry ho amin’ny fahatezerana toy ny hafa koa isika.

⁴Andriamanitra anefa manankarena famindrampo, noho ny halehiben’ny fitiavany izay nitiavany antsika,

⁵koa fony mbola maty noho ny fahadisoana isika dia novelominy niaraka tamin’i Kristy*. Fahasoavana no namonjena anareo.

⁶Niara-natsangany isika ary niara-napetrany any an-danitra ao amin’i Kristy Jesosy

⁷mba hasehony amin’ny andro ho avy ny harenan’ny fahasoavany tsy hita lany amin’ny fahamoram-panahiny amintsika ao amin’i Kristy Jesosy.

⁸Fa fahasoavana no namonjena anareo amin’ny alalan’ny finoana; ary tsy avy aminareo izany, fa fanomezana avy amin’Andriamanitra;

⁹tsy avy amin’ny asa, fandrao hisy hirehareha.

¹⁰Fa asany isika, voaforona tao amin’i Kristy Jesosy mba hanao asa tsara izay nomanin’Andriamanitra rahateo mba handehanantsika amin’izany.

¹¹Koa tsarovy fa fahiny ianareo dia Jentilisa* araka ny nofo ka nolazain’ny voaforan-tanana teo amin’ny nofo hoe tsy voafora.

¹²Eny, tsy nanana an’i Kristy* ianareo tamin’izany andro izany, fa olon-ko azy tamin’ny fanjakan’ny Israely ary vahiny tamin’ireo faneken’ny teny fikasana, tsy nanana fanantenana sady tsy nanana an’Andriamanitra teo amin’izao tontolo izao.

¹³Ankehitriny kosa, ao amin’i Kristy Jesosy, ianareo izay lavitra fahiny dia tonga akaiky noho ny ran’i Kristy.

¹⁴Izy no fihavanantsika izay nahatonga antsika roa tonta ho iray ka nandrava ny efitry ny fisarahana: Tao amin’ny nofony no nandravany ny fifandrafiana.

¹⁵Nofoanany ny lalàna nisy didy natao hotandremana mba hanakambanany antsika roa tonta ao amin’ny tenany ho olom-baovao iray ka nanaovany fihavanana,

¹⁶sady hampihavana antsika roa tonta ho tena iray amin’Andriamanitra noho ny hazofijaliana izay namonoany ny fifandrafiana tao aminy.

¹⁷Tonga Izy nitory teny soa mahafaly nilaza fihavanana taminareo izay lavitra ary fihavanana koa tamin’izay akaiky,

¹⁸satria Izy no ahafahantsika roa tonta manatona ny Ray amin’ny Fanahy iray.

¹⁹Koa tsy vahiny sy mpivahiny intsony ianareo fa tompon-tany, mpiray fanjakana amin’ny olona masina sady ankohonan’Andriamanitra,

²⁰naorina teo ambonin’ny fanorenan’ny Apostoly sy ny mpaminany; ary Kristy Jesosy no vato fehizoro.

²¹Ao Aminy no irafetan’ny rafitra rehetra, mitombo ho tempoly* masina ao amin’ny Tompo;

²²ao Aminy koa ianareo no miaraka aorina ho fonenan’Andriamanitra ao amin’ny Fanahy.