Read La Bible en Malgache Efesiana 3 Bible Online

Efesiana 3 - La Bible en Malgache bible

Efesiana 3

¹Noho izany, izaho Paoly, mpifatotra noho ny amin’i Kristy* Jesosy, noho ny aminareo Jentilisa*,

²raha mba renareo mantsy ny fitantanan’Andriamanitra ny fahasoavany izay nomeny ahy noho ny aminareo,

³fa fanambaràna no nampahafantarana ahy ny zavamiafina, araka ny voasoratro tamin’ny teny fohifohy teo.

⁴Araka izany, raha mamaky ianareo dia ho takatrareo ny fahafantarako ny zava-niafina momba an’i Kristy,

⁵izay tsy mbola nampahafantarina ny zanak’olombelona tamin’ny taranaka lasa. Izany dia tahaka ny fanambaràn’ny Fanahy ankehitriny amin’ny Apostoly masina sy ny mpaminany,

⁶dia ny hahatongavan’ny Jentilisa ho mpiray lova sy ho tena iray ary ho mpiombona ny teny fikasana ao amin’i Kristy Jesosy noho ny Filazantsara

⁷izay nanaovana ahy ho mpanompo, araka ny fanomezan’ny fahasoavan’Andriamanitra izay nomena ahy araka ny fiasan’ny heriny.

⁸Eny, izaho izay kely indrindra amin’ny olona masina rehetra, no nomena izao fahasoavana izao, mba hitory ny haren’i Kristy tsy hita lany amin’ny Jentilisa

⁹sy hampahazava ny olona rehetra mba hahalalany ny fitondran’Andriamanitra ny zavamiafina, dia ilay voafina hatramin’ny nahariana izao tontolo izao tao amin’Andriamanitra izay nanao ny zavatra rehetra;

¹⁰mba hampahafantarina amin’ny alalan’ny fiangonana[2] an’ireo fanapahana sy fahefana any an-danitra amin’izao ankehitriny izao ny lafiny maro samihafa amin’ny fahendren’Andriamanitra,

¹¹araka ny fikasana hatrizay hatrizay izay nataony tao amin’i Kristy Jesosy Tompontsika.

¹²Ao Aminy no ananantsika fahasahiana hanatona Azy amin’ny fahatokiana, noho ny finoana Azy.

¹³Noho izany no angatahako aminareo mba tsy ho ketraka ianareo amin’ny fahoriako noho ny aminareo, fa voninahitrareo izany.

¹⁴Izany no antony andohalehako eo anatrehan’ny Ray

¹⁵izay ahazoan’ny fianakaviana rehetra any an-danitra sy etỳ an-tany anarana,

¹⁶mba homeny anareo, araka ny harenan’ny voninahiny, ny tanjaka sy ny hery avy ao anaty amin’ny alalan’ny Fanahiny;

¹⁷ary koa mba hitoeran’i Kristy* ao am-ponareo amin’ny finoana dia hamahatra sy hiorina mafy amin’ny fitiavana ianareo

¹⁸ka hahaizanareo mbamin’ny olona masina rehetra hahafantatra tsara izay sakany, lavany, haavony ary halaliny,

¹⁹ary hahalala ny fitiavan’i Kristy, izay mihoatra noho ny fahalalana, mba hamenoana anareo amin’ny fahafenoan’Andriamanitra rehetra.

²⁰Ary ho an’Ilay mahavita mihoatra noho ny zavatra rehetra; eny, mihoatra lavitra noho izay rehetra angatahintsika na heverintsika aza, araka ny hery izay miasa ato amintsika,

²¹ho Azy anie ny voninahitra ao amin’ny fiangonana[3] sy ao amin’i Kristy Jesosy hatramin’ny taranaka rehetra mandrakizay mandrakizay. Amena*.