Read La Bible en Malgache Efesiana 5 Bible Online

Efesiana 5 - La Bible en Malgache bible

Efesiana 5

¹Koa aoka hanahaka an’Andriamanitra ianareo, tahaka ny zanaka malala;

²ary mandehana amin’ny fitiavana, toy ny nitiavan’i Kristy anareo ka nanolorany ny tenany ho an’Andriamanitra ho fanatitra sy ho fanavotana ary ho hanitra ankasitrahana.

³Fa ny fijangajangana sy ny fahalotoana rehetra, na ny fitiavam-bola, dia aza avela hotononina eo aminareo akory, fa tsy mahamendrika ny olona masina,

⁴na fahavetavetana, na resaka adaladala, na teniteny foana. Samy tsy tokony hatao, fa aleo teny fisaorana.

⁵Aoka ho fantatrareo mihitsy fa samy tsy manana lova eo amin’ny fanjakan’i Kristy sy Andriamanitra na ny mpijangajanga rehetra, na ny olom-betaveta, na ny olona tia vola, fa fanompoan-tsampy izany.

⁶Aza mety fitahin’olona amin’ny teny foana ianareo fa izany zavatra izany no mahatonga ny fahatezeran’Andriamanitra amin’ny olona tsy mankatò.

⁷Aza mety ho mpiombona aminy ianareo.

⁸Fa maizina ianareo fahiny, nefa efa mazava ao amin’ny Tompo kosa ankehitriny. Mandehana tahaka ny zanaky ny mazava

⁹satria ny vokatry ny mazava dia ao amin’ny fahatsaram-panahy rehetra sy ny fahamarinana ary ny fahitsiana.

¹⁰Fantaro izay ankasitrahan’ny Tompo,

¹¹ary aza miombona amin’ny asan’ny maizina tsy mahavoka-tsoa, fa aleo mampahafantatra izany.

¹²Izay ataony ao amin’ny miafina mantsy dia mahamenatra na dia ny milaza azy ihany aza.

¹³Fa ny zavatra rehetra, rehefa ampahafantarina, dia asehon’ny mazava;

¹⁴fa na inona na inona aseho dia mazava. Koa izany no ilazany hoe: Mifohaza ianao izay matory ary mitsangàna amin’ny maty, dia hampahazava anao Kristy*.

¹⁵Koa tandremo tsara izay fitondrantenanareo, mba tsy ho tahaka ny adala fa tahaka ny hendry.

¹⁶Araraoty ny fotoana azo anaovan-tsoa fa ratsy izao andro izao.

¹⁷Ary noho izany dia aza miadaladala fa fantaro izay sitrapon’ny Tompo.

¹⁸Aza ho mamon-divay ianareo fa misy fanaranam-po amin’ny ratsy amin’izany. Aoka ianareo ho feno ny Fanahy;

¹⁹mifampiresaha amin’ny salamo sy ny hira ary ny tononkiram-panahy, dia mihirà sy mikaloa ao am-ponareo ho an’ny Tompo.

²⁰Misaora mandrakariva an’Andriamanitra Ray noho ny zavatra rehetra, amin’ny anaran’i Jesosy Kristy Tompontsika.

²¹Mifaneke amin’ny fahatahorana an’i Kristy* ianareo;

²²ny vehivavy hanaiky ny vadiny, tahaka ny anekena ny Tompo

²³satria ny lahy no lohan’ny vavy, tahaka an’i Kristy koa izay Lohan’ny fiangonana[4]; ary Izy no mpamonjy ny tena.

²⁴Tahaka ny aneken’ny fiangonana an’i Kristy koa no haneken’ny vavy ny lahy amin’ny zavatra rehetra.

²⁵Ianareo lehilahy, tiava ny vadinareo, tahaka ny nitiavan’i Kristy ny fiangonana ka nanolorany ny tenany hamonjy azy

²⁶mba hahamasina azy amin’ny anadiovany azy amin’ny rano fanasana ao amin’ny teny;

²⁷mba hasehony ho an’ny tenany izany ho fiangonana malaza, tsy misy pentimpentina, na fiketronana, na izay toy izany, fa mba ho masina sady tsy misy tsiny izy.

²⁸Dia tahaka izany koa, ny lehilahy dia tokony ho tia ny vadiny tahaka ny tenany ihany. Izay tia ny vadiny dia tia ny tenany.

²⁹Fa tsy mbola nisy mihitsy olona tsy tia ny tenany, fa mamelona sy mitaiza azy izy tahaka izay ataon’i Kristy amin’ny fiangonana,

³⁰satria momba ny tenany isika.

³¹«Ary noho izany ny lehilahy dia handao ny rainy sy ny reniny ka hiray amin’ny vadiny, dia ho nofo iray ihany izy roa» (Gen 2.24).

³²Zavamiafina lehibe izany; milaza ny amin’i Kristy sy ny fiangonana mantsy aho.

³³Na izany aza, samia tia ny vadiny tahaka ny tenany ianareo lehilahy, ary aoka kosa ny vavy hanaja ny lahy.