Read La Bible en Malgache Efesiana 6 Bible Online

Efesiana 6 - La Bible en Malgache bible

Efesiana 6

¹Anaka, ankatoavy ao amin’ny Tompo ny ray aman-dreninareo fa rariny izany.

²«Manajà ny ray sy ny reninao» fa izany no didy voalohany misy teny fikasana,

³«mba hahita soa ianao sady ho maro andro ambonin’ny tany» (Deo 5.16).

⁴Ary ianareo ray, aza mampahatezitra ny zanakareo, fa tezao amin’ny fanabeazana sy ny fananaran’ny Tompo izy.

⁵Ianareo mpanompo, ankatoavy amin’ny fahatahorana sy ny fangovitana, amin’ny fahatsoran’ny fonareo, ny tomponareo araka ny nofo, tahaka ny fanekena an’i Kristy* ihany,

⁶tsy amin’ny fanompoana eo imaso, tahaka ny mpila sitraka amin’olona, fa tahaka ny mpanompon’i Kristy manao izay sitrapon’Andriamanitra amin’ny fo,

⁷manompo an-tsitrapo toy ny amin’ny Tompo, fa tsy amin’olona,

⁸satria fantatrareo fa izay soa ataon’ny olona tsirairay no horaisiny amin’ny Tompo, na andevo izy na olona afaka.

⁹Ianareo tompo, manaova toy izany koa amin’ny mpanomponareo. Atsaharo ny fandrahonana, satria fantatrareo fa any an-danitra ny Tompony sady Tomponareo koa; ary tsy mizaha tavan’olona Izy.

¹⁰Farany, mahereza ao amin’ny Tompo sy amin’ny tanjaky ny heriny.

¹¹Tafio avokoa ny fiadian’Andriamanitra mba hahazoanareo hifahatra amin’ny fanangolen’ny devoly*.

¹²Fa tsy mitolona amin’ny nofo aman-dra isika fa amin’ny fanapahana sy amin’ny fahefana ary amin’ny mpanjakan’izao fahamaizinana izao, dia amin’ny fanahy ratsy eny amin’ny rivotra.

¹³Noho izany, raiso avokoa ny fiadian’Andriamanitra mba hahazoanareo hanohitra amin’ny andro mahory; ary rehefa vitanareo avokoa izany dia hahafahatra ianareo.

¹⁴Mifahara ary ka misikìna fahamarinana. Mitafia ny rariny ho fiarovan-tratra,

¹⁵kiraroy ny fahavononam-panahy avy amin’ny Filazantsaran’ny fihavanana ny tongotrareo.

¹⁶Amin’ny toe-javatra rehetra dia tano ny finoana ho ampinga fa izany no hahazoanareo mamono ny zana-tsipìka mirehitra rehetra alefan’ilay ratsy.

¹⁷Raiso ny famonjena ho fiarovan-doha ary ny tenin’Andriamanitra ho sabatry ny Fanahy.

¹⁸Mivavaha mandrakariva ao amin’ny Fanahy amin’ny fivavahana rehetra sy ny fangatahana, koa miambena amin’izany amin’ny faharetana sy ny fangatahana ho an’ny olona masina rehetra,

¹⁹ary ho ahy koa, mba homena ahy ny hiloa-bava ka hiteny amin’ny fahasahiana, hampahafantatra ny zavamiafina momba ny Filazantsara.

²⁰Iraka migadra noho izany aho, mba hiteny izany amin’ny fahasahiana, araka izay tokony hoteneniko.

²¹Mba hahafantaranareo izay momba ahy sy izay ataoko, dia i Tikiko, rahalahy malala sady mpanompo mahatoky ao amin’ny Tompo, no hampahalala anareo ny zavatra rehetra.

²²Izy mihitsy no nirahiko hilaza izany zavatra izany aminareo mba ho fantatrareo ny momba anay, ary mba hampahereziny ny fonareo.

²³Fiadanana anie ho an’ny rahalahy ary fitiavana mbamin’ny finoana avy amin’Andriamanitra Ray sy Jesosy Kristy* Tompo.

²⁴Ny fahasoavana anie ho amin’izay rehetra tia an’i Jesosy Kristy Tompontsika amin’ny fitiavana tsy mety levona. Amena*.