Read La Bible en Malgache Filipiana 1 Bible Online

Filipiana 1 - La Bible en Malgache bible

Filipiana 1

¹I Paoly sy i Timoty, mpanompon’i Kristy* Jesosy, no mamangy ny olona masina rehetra ao amin’i Kristy Jesosy mbamin’ny mpitandrina[1] sy ny diakona izay any Filipia:

²Ho aminareo anie ny fahasoavana sy ny fiadanana avy amin’Andriamanitra Raintsika sy Jesosy Kristy Tompo!

³Misaotra an’Andriamanitra aho isaky ny mahatsiaro anareo.

⁴Mandrakariva, rehefa mivavaka ho anareo rehetra aho, dia mangataka amin’ny fifaliana,

⁵noho ny fiombonanareo amin’ny Filazantsara hatramin’ny andro voalohany ka mandraka ankehitriny.

⁶Matoky indrindra aho fa Izay nanomboka asa tsara tao anatinareo no hahatanteraka izany mandra-piavin’ny andron’i Jesosy Kristy*.

⁷Marina izany fiheverako anareo rehetra izany, fa ato am-poko sady mpiombona amin’ny fahasoavana ananako ianareo rehetra, na amin’ny fifatorako na amin’ny fiarovako sy fanamafisako orina ny Filazantsara.

⁸Andriamanitra no vavolombeloko, fa tia anareo rehetra tokoa aho amin’ny fitiavan’i Kristy Jesosy.

⁹Ary izao no angatahiko dia ny mbola hitomboan’ny fitiavanareo bebe kokoa amin’ny fahalalana tsara sy ny fahaiza-mamantatra rehetra

¹⁰mba hamantaranareo izay zava-dehibe, mba ho madio am-po sy tsy hanan-tsiny ianareo amin’ny andron’i Kristy

¹¹sady ho feno ny vokatry ny fahamarinana, izay avy amin’ny alalan’i Jesosy Kristy, ho voninahitra sy fiderana an’Andriamanitra.

¹²Tiako ho fantatrareo, ry rahalahy, fa izay zavatra nanjo ahy dia vao mainka tonga fampandrosoana ny Filazantsara.

¹³Tonga fantatry ny mpiambina rehetra mbamin’ny olona hafa rehetra mantsy fa noho ny amin’i Kristy* no ifatorako,

¹⁴ary ny ankabeazan’ny rahalahy dia efa matoky ao amin’ny Tompo noho ny fifatorako ka mitombo fahasahiana hitory tsy amin-tahotra ny tenin’Andriamanitra.

¹⁵Fialonana sy fifandirana aza no itorian’ny sasany an’i Kristy ary fikasana tsara kosa ny an’ny sasany;

¹⁶fitiavana ny an’ny sasany satria fantany fa voatendry ho mpiaro ny Filazantsara aho;

¹⁷fifampiandaniana kosa no itorian’ny sasany an’i Kristy, fa tsy mba amin’ny fo madio, ka mihevitra hanampy fahoriana ny fifatorako izy.

¹⁸Ahoana ary? Amin’izay atao rehetra, na amin’ny fihatsarambelatsihy na amin’ny marina, dia Kristy no torina, ary mifaly amin’izany aho; eny, mbola hifaly ihany.

¹⁹Fantatro mantsy fa ho tonga famonjena ahy izany noho ny fangatahanareo sy ny fanampian’ny Fanahin’i Jesosy Kristy.

²⁰Fatratra tokoa ny faniriako sy ny fanantenako fa tsy hitsanga-menatra aho, na amin’ny inona na amin’ny inona, fa tahaka ny isanandro; eny, ankehitriny koa dia amin’ny fahasahiana rehetra no hankalazana an’i Kristy ao amin’ny tenako, na amin’ny fiainana, na amin’ny fahafatesana.

²¹Fa Kristy no antony ahavelomako ary ny fahafatesana no hahazoako tombony.

²²Kanefa raha ny ho velona amin’ny nofo no hampahavokatra ny asako dia tsy hitako izay hofidiko,

²³fa sanganehana eo anelanelan’izy roa aho: Maniry hiala aho ka ho ao amin’i Kristy, satria tsara lavitra izany;

²⁴kanefa ny hitoerako eo amin’ny nofo no mahasoa anareo kokoa.

²⁵Matoky izany aho ka fantatro fa hitoetra sy haharitra eo aminareo rehetra mba hahazoanareo fandrosoana sy fifaliana amin’ny finoanareo

²⁶ka hitombo noho ny ataoko ny firavoravoanareo ao amin’i Kristy Jesosy, amin’ny hankanesako atỳ aminareo indray.

²⁷Izao ihany no teniko: Aoka ny fitondrantenanareo ho mendrika ny Filazantsaran’i Kristy* ka na ho tonga hahita anareo aho na tsy ho tonga dia handre ny momba anareo, fa maharitra amin’ny fanahy iray ianareo ka miray fo hiara-miezaka hampandroso ny finoana ny Filazantsara,

²⁸ka tsy ho azon’ny fahavalo ampitahorina ianareo na amin’ny inona na amin’ny inona. Amin’ireo fahavalo dia mariky ny fahaverezana izany, fa aminareo kosa dia mariky ny famonjena sady avy amin’Andriamanitra.

²⁹Fa efa nomena fahasoavana ianareo noho ny amin’i Kristy, tsy ny hino Azy ihany fa ny hiharam-pahoriana koa noho ny Aminy.

³⁰Manana izany ady izany ianareo, izay hitanareo teo amiko sady mbola renareo fa ato amiko ihany ankehitriny.