Read La Bible en Malgache Filipiana 3 Bible Online

Filipiana 3 - La Bible en Malgache bible

Filipiana 3

¹Farany, ry rahalahy, mifalia ao amin’ny Tompo. Tsy manahirana ahy ny manoratra teny averina fa mahatsara anareo izany.

²Mitandrema tena amin’ny amboa, mitandrema tena amin’ny mpanao ratsy, mitandrema tena amin’ny mpomba ny famorana ivelany fotsiny.

³Fa isika no voafora, izay manompo amin’ny Fanahin’Andriamanitra ary mirehareha ao amin’i Kristy* Jesosy ka tsy mitoky amin’ny nofo.

⁴Kanefa mba manana izay itokiako amin’ny nofo ihany aho. Raha misy olona mihevitra hitoky amin’ny nofo dia manoatra noho izany aho:

⁵Voafora tamin’ny andro fahavalo aho; ary avy amin’ny fototr’Israely, dia avy amin’ny fokon’i Benjamina; Hebreo sady avy amin’ny Hebreo aho; araka ny lalàna dia Fariseo*;

⁶araka ny zotom-po dia nanenjika ny fiangonana[2]; araka ny fahamarinana avy amin’ny lalàna dia tsy nanan-tsiny.

⁷Nefa izay azoko ho tombony dia nataoko fatiantoka kosa noho ny amin’i Kristy.

⁸Eny tokoa, fa ataoko ho fatiantoka avokoa ny zavatra rehetra noho ny maha ambony indrindra ny hatsaran’ny fahalalana an’i Kristy Jesosy Tompoko. Noho Izy no nanaovako ho fatiantoka ny zavatra rehetra ka ataoko ho toy ny taimboraka ireny mba hahazoako an’i Kristy;

⁹ary mba ho hita ao Aminy ho tsy manana ny fahamarinako izay avy amin’ny lalàna aho, fa izay avy amin’ny finoana an’i Kristy, dia ny fahamarinan’Andriamanitra amin’ny finoana.

¹⁰Eny, mba ho fantatro Izy sy ny herin’ny fitsanganany tamin’ny maty ary ny fiombonana amin’ny fijaliany ka hampitoviana amin’ny endriky ny fahafatesany aho,

¹¹raha mba misy hahatratrarako ny fitsanganana amin’ny maty.

¹²Tsy toy ny efa nahazo sahady aho na efa tanteraka sahady; fa miezaka aho hihazona izay nihazonan’i Kristy* Jesosy ahy.

¹³Ry rahalahy, tsy mihevi-tena ho efa nahazo aho; fa zavatra iray loha no ataoko: Manadino izay zavatra ao aoriana ka miezaka hanatratra izay zavatra eo aloha;

¹⁴eny, miezaka hanatratra ny marika aho hahazoako ny lokan’ny fiantsoan’Andriamanitra any ambony ao amin’i Kristy Jesosy.

¹⁵Koa aoka isika rehetra izay tanteraka hisaina toy izany; fa hasehon’Andriamanitra aminareo izany raha sendra manana sain-kafa ianareo.

¹⁶Kanefa aoka ho amin’ilay efa azontsika sahady no mbola hizorantsika.

¹⁷Ry rahalahy, aoka samy hanahaka ahy ianareo ka diniho izay mandeha tahaka ny anananareo anay ho marika.

¹⁸Fa maro no mandeha, izay efa nolazaiko taminareo matetika, sady mbola lazaiko aminareo amin’ny fitomaniana koa ankehitriny kanefa fahavalon’ny hazofijalian’i Kristy ireny;

¹⁹fahaverezana no hiafarany, ny kibony no andriamaniny, ny fahamenarany no voninahiny, tsy misaina afa-tsy ny zavatry ny tany izy.

²⁰Fa ny fanjakantsika dia any an-danitra ary avy any koa no iandrasantsika Mpamonjy, dia Jesosy Kristy Tompo,

²¹izay hanova ny tenantsika voaetry hitovy endrika amin’ny tenan’ny voninahiny, araka ny fiasan’ny heriny, izay ahaizany mampanaiky ny zavatra rehetra ho eo ambany fahefany.