Read La Bible en Malgache Filipiana 4 Bible Online

Filipiana 4 - La Bible en Malgache bible

Filipiana 4

¹Ary amin’izany, ry rahalahy sady malalako no mahamanina ahy, fifaliako sy satroboninahitro, tomoera tsara ao amin’ny Tompo ianareo, ry malalako!

²Mananatra an’i Eodia aho ary mananatra an’i Sintike mba hiray saina ao amin’ny Tompo izy ireo.

³Eny, mangataka aminao koa aho, ry ilay tena mpiara-miasa amiko, manampia azy roa vavy fa niara-niasa fatratra tamiko teo amin’ny Filazantsara izy ireo, mbamin’i Klementa sy ireo mpiara-miasa amiko sisa, izay voasoratra ao amin’ny bokin’ny fiainana ny anarany.

⁴Mifalia mandrakariva ao amin’ny Tompo; hoy indray aho: Mifalia!

⁵Aoka ho fantatry ny olona rehetra ny fandeferanareo. Efa akaiky ny Tompo.

⁶Aza manahy na amin’ny inona na amin’ny inona fa aoka ny fivavahana sy ny fifonana mbamin’ny fisaorana no hoentinareo manambara ny fangatahanareo amin’Andriamanitra amin’ny zavatra rehetra.

⁷Ary ny fiadanan’Andriamanitra izay mihoatra noho ny fahalalana rehetra, hiaro ny fonareo sy ny hevitrareo ao amin’i Kristy* Jesosy.

⁸Farany, ry rahalahy, na inona na inona marina, na inona na inona manan-kaja, na inona na inona mahitsy, na inona na inona madio, na inona na inona maha te ho tia, na inona na inona tsara laza, raha misy hatsaram-panahy ary raha misy dera, dia hevero izany.

⁹Ataovy izay efa nianaranareo sy efa noraisinareo ary efa renareo sy efa hitanareo tamiko. Ary ho aminareo ny Andriamanitry ny fiadanana.

¹⁰Ary faly indrindra ao amin’ny Tompo aho satria nampitsimohanareo indray ankehitriny ny fiheverana ahy, izay efa noheverinareo rahateo, saingy tsy mbola nahita andro hanaovana izany ianareo.

¹¹Tsy filan-javatra anefa no ilazako izany satria efa nianatra tsy hierina aho na manao ahoana na manao ahoana.

¹²Mahay mivelona amin’ny fahantrana aho ary mahay mivelona amin’ny fananam-be; na aiza na aiza, ary na amin’ny inona na amin’ny inona, dia efa nampianarina ny ho voky sy ho noana ary hanam-be sy hahantra aho.

¹³Mahay ny zavatra rehetra aho ao amin’Ilay mampahery ahy.

¹⁴Kanefa nanao soa ianareo tamin’ny niarahanareo ory tamiko.

¹⁵Ary fantatrareo koa, ry Filipiana, fa tamin’ny niandohan’ny Filazantsara, rehefa niala tany Makedonia aho dia tsy nisy fiangonana[3] nifampiraharaha tamiko ny amin’ny fanomezana ho ahy sy izay avy amiko, afa-tsy ianareo ihany.

¹⁶Fa fony tany Tesalonika aza aho dia nampanatitra zavatra hahasoa ahy indray mandeha amana indroa ianareo.

¹⁷Nefa tsy toy ny mitady ny fanomezana no ilazako izany; fa mitady ny vokatra izay hitombo ho voninahitrareo aho.

¹⁸Manana ny zavatra rehetra aho sady manana amby ampy aza; feno aho, rehefa nandray tamin’i Epafrodito ilay zavatra nampitondrainareo, dia hanitra mani-pofona, fanatitra tian’Andriamanitra sady ankasitrahany.

¹⁹Koa Andriamanitro anie hanatanteraka izay rehetra tokony ho anareo araka ny harenany amin’ny voninahitra ao amin’i Kristy* Jesosy.

²⁰Ary ho an’Andriamanitra Raintsika anie ny voninahitra mandrakizay mandrakizay! Amena*!

²¹Manaova veloma ny olona masina rehetra ao amin’i Kristy* Jesosy. Manao veloma anareo ny rahalahy izay ato amiko.

²²Manao veloma anareo ny olona masina rehetra, indrindra fa ny ankohonan’i Kaisara.

²³Ho amin’ny fanahinareo anie ny fahasoavan’i Jesosy Kristy Tompo!