Read La Bible en Malgache Kolosiana 1 Bible Online

Kolosiana 1 - La Bible en Malgache bible

Kolosiana 1

¹I Paoly, apostolin’i Kristy* Jesosy noho ny sitrapon’Andriamanitra, sy i Timoty rahalahy,

²no mamangy ny olona masina any Kolosia, dia ny rahalahy mahatoky ao amin’i Kristy: Ho aminareo anie ny fahasoavana sy ny fiadanana avy amin’Andriamanitra Raintsika.

³Misaotra an’Andriamanitra Rain’i Jesosy Kristy* Tompontsika izahay ary mivavaka mandrakariva ho anareo;

⁴fa renay ny finoanareo an’i Kristy Jesosy sy ny fitiavanareo ny olona masina rehetra,

⁵noho ny fanantenana izay tahirizina any an-danitra ho anareo, fanantenana efa renareo fahiny tamin’ny tenin’ny fahamarinana dia ny Filazantsara.

⁶Io Filazantsara io dia efa tonga eo aminareo ka mamokatra sy mitombo tahaka ny eo amin’izao tontolo izao; toy izany koa ny eo aminareo, hatramin’ny andro nandraisanareo sy nahalalanareo tsara ny fahamarinan’ny fahasoavan’Andriamanitra,

⁷araka ny efa renareo tamin’i Epafra, mpanompo namanay sady malala, izay mpanompon’i Kristy mahatoky eo aminareo;

⁸izy koa no nanambara taminay ny fitiavanareo ao amin’ny Fanahy.

⁹Noho izany, izahay koa dia tsy mitsahatra mivavaka sy mangataka ho anareo hatramin’ny andro nandrenesanay, mba hofenoina ny fahalalana ny sitrapony ianareo amin’ny fahendrena sy ny fahazavan-tsaina rehetra avy amin’ny Fanahy,

¹⁰mba handehananareo mendrika ny Tompo, manao ny sitrapony amin’ny zavatra rehetra, mahavokatra amin’ny asa tsara rehetra sady mitombo amin’ny fahalalana tsara an’Andriamanitra;

¹¹mba hampahatanjahina amin’ny hery rehetra araka ny herin’ny voninahiny ianareo ka hanana ny faharetana rehetra sy ny fahari-po. Amin’ny fifaliana

¹²no isaory ny Ray izay nampahamendrika anareo hanana anjara amin’ny lovan’ny olona masina eo amin’ny mazava

¹³sady nahafaka antsika tamin’ny fahefan’ny maizina ka namindra antsika ho amin’ny fanjakan’ny Zanany malalany

¹⁴izay ananantsika fanavotana, dia ny famelana ny helotsika.

¹⁵Izy no endrik’Andriamanitra tsy hita maso, Ilay Lahimatoa talohan’izao zavatra ary rehetra izao;

¹⁶fa tao Aminy no nahariana ny zavatra rehetra any an-danitra sy etỳ ambonin’ny tany, dia ny hita sy ny tsy hita, na fiandrianana, na fanjakana, na fanapahana, na fahefana; Izy no nahariana ny zavatra rehetra sady ho Azy izany;

¹⁷Izy no talohan’ny zavatra rehetra sady ao Aminy no aharetan’ny zavatra rehetra.

¹⁸Izy no Lohan’ny tena, dia ny fiangonana[1]; Izy no voalohany, dia ny Lahimatoa amin’ny maty, mba ho Lohany amin’ny zavatra rehetra Izy.

¹⁹Fa sitraky ny Ray ho ao Aminy no hitoeran’ny fahafenoana rehetra

²⁰sady Izy no hampihavanany Aminy ny zavatra rehetra ka ny rany teo amin’ny hazofijaliana no nanaovany fampihavanana; eny, Izy hoy aho, no fampihavanana, na ny etỳ ambonin’ny tany, na ny any an-danitra.

²¹Ary ianareo izay vahiny fahiny sady fahavalo tamin’ny fomba fisainanareo sy ny asa ratsy nataonareo

²²dia efa nampihavaniny tao amin’ny tenan’ny nofony ankehitriny, tamin’ny fahafatesana, mba hatolony ho masina sady tsy hanan-tsiny amam-pondro eo anatrehany,

²³raha maharitra amin’ny finoana ianareo ka mafy orina sady tafatoetra ary tsy mety hafindra hiala amin’ny fanantenana avy amin’ny Filazantsara izay efa renareo sady torina eny ambanin’ny lanitra rehetra eny; ary izany no nanaovana ahy Paoly ho mpanompo.

²⁴Ankehitriny dia mifaly amin’ny fiaretako ho anareo aho ary manatanteraka ao amin’ny nofoko izay tsy vita tamin’ny fahorian’i Kristy* ho an’ny tenany, dia ny fiangonana[2].

²⁵Izy no nahatonga ahy ho mpanompo, araka ny andraikitra nomen’Andriamanitra ahy teo aminareo, mba hahatanteraka ny fitoriana ny tenin’Andriamanitra,

²⁶dia ny zavamiafina, ilay voafina hatramin’ny fahagola sy ny taranaka maro, fa voaseho amin’ny olony masina kosa ankehitriny.

²⁷Tamin’ireo olona masina ireo no tian’Andriamanitra nampahafantarina ny harenan’ny voninahitr’ity zavamiafina ity any amin’ny Jentilisa*, dia Kristy ao anatinareo, izay fanantenana ny voninahitra.

²⁸Izy no torinay amin’ny fampitandremanay sy ny fampianaranay ny olona rehetra amin’ny fahendrena rehetra, mba samy hatolotray ho tanteraka ao amin’i Kristy izy rehetra.

²⁹Ary ny hahatanteraka izany no ikelezako aina koa sy iezahako fatratra araka ny fiasan’ny herin’Ilay miasa amin-kery ato anatiko.