Read La Bible en Malgache Kolosiana 2 Bible Online

Kolosiana 2 - La Bible en Malgache bible

Kolosiana 2

¹Fa tiako ho fantatrareo ny hamafin’ny fiezahako ho anareo sy izay any Laodikia mbamin’izay rehetra tsy mbola nahita ny tavako amin’ny nofo,

²mba hampaherezina ny fony amin’ny ampiraisana azy amin’ny fitiavana ka ho feno fahatokiana be avy amin’ny fahazavan-tsaina izy, ary hahalala tsara ny zavamiafina izay an’Andriamanitra, dia Kristy,

³izay iafenan’ny rakitry ny fahendrena sy ny fahalalana rehetra.

⁴Izany no lazaiko, fandrao hisy hampahadiso hevitra anareo amin’ny teny toa marina.

⁵Fa na dia tsy manatrika anareo amin’ny nofo aza aho dia miaraka aminareo ihany amin’ny fanahy ka mifaly sy mijery ny filaminanareo sy ny tsy fiovan’ny finoanareo an’i Kristy.

⁶Koa tahaka ny nandraisanareo an’i Kristy* Jesosy Tompo dia mandehana koa ao Aminy araka izany;

⁷mifahatra tsara sy miorina mafy ao Aminy ary tafatoetra amin’ny finoana, toy ny efa nampianarana anareo ka feno fisaorana amin’izany.

⁸Tandremo fandrao misy mahalasa anareo ho babony amin’ny filozofia sy ny famitahana foana, araka ny fampianarana voatolotry ny razana, araka ny abidim-pianaran’izao tontolo izao, fa tsy araka an’i Kristy.

⁹Fa ao amin’ny tenany no itoeran’ny fahafenoan’ny fomban’Andriamanitra rehetra;

¹⁰ary ianareo dia tanteraka ao Aminy sady Izy no lohan’ny fanapahana sy ny fahefana rehetra.

¹¹Tao Aminy koa no namorana anareo tamin’ny famorana tsy nataon-tanana, tamin’ny fanesorana ny tenan’ny nofo, dia tamin’ny famoran’i Kristy.

¹²Fa niara-nalevina Taminy ianareo tamin’ny batisa, ary tao Aminy koa no niara-natsangana Taminy noho ny finoana ny asan’Andriamanitra izay nanangana Azy tamin’ny maty.

¹³Ary ianareo, izay efa matin’ny fahadisoana sy ny tsy fiforan’ny nofonareo, dia novelominy niaraka tamin’i Kristy. Efa navelany avokoa ny fahadisoantsika rehetra;

¹⁴novonoiny ny didy voasora-tanana izay niampanga antsika; nesoriny izany ka nohomboany tamin’ny hazofijaliana;

¹⁵noreseny ny fiandrianana sy ny fahefana ary nasehony miharihary ny fitondrany ireo amin’ny fandresen’ny hazofijaliana.

¹⁶Koa aza avela hisy hitsara anareo, na amin’ny fihinana, na amin’ny fisotro, na ny andro firavoravoana, na ny voaloham-bolana, na ny Sabata*;

¹⁷aloky ny zavatra ho avy ireny, fa ny tena izy dia Kristy.

¹⁸Aza mety hofitahin’ny olona amin’ny fanetren-tena diso sy ny fivavahana amin’ny anjely ianareo; mitompo amin’ny zavatra hitany izy ireny sady feno fiavonavonana noho ny fisainany ara-nofo

¹⁹ka tsy mihazona ny loha izay Izy no itomboan’ny tena rehetra, izay velomina sy ampiraisina tsara amin’ny vanin-taolana sy ny hozatra, araka ny fampitomboana izay avy amin’Andriamanitra.

²⁰Ary raha niara-maty tamin’i Kristy* ianareo ka efa afaka tamin’ny abidim-pianaran’izao tontolo izao, nahoana no toa mbola velona amin’izao tontolo izao ihany ka mety hodidiana hoe:

²¹Aza mandray, aza manandrana, aza manendry.

²²Levona izany rehetra izany rehefa ampiasaina, fa didy sy fampianarana avy amin’olona ihany.

²³Izany rehetra izany dia ankalazaina ho fahendrena amin’ny fivavahana noterena sy ny fanetren-tena diso ary ny fampahoriana ny tena, nefa tsy manan-kery hahasakana ny fampanaranam-po ny nofo akory.