Read La Bible en Malgache Kolosiana 4 Bible Online

Kolosiana 4 - La Bible en Malgache bible

Kolosiana 4

¹Ianareo tompo, ataovy amin’ny mpanomponareo izay marina sy izay mety, satria fantatrareo fa mba manana Tompo any an-danitra koa ianareo.

²Mahareta amin’ny fivavahana ka miambena amin’izany amin’ny fisaorana.

³Mangataha koa ho anay mba hamoahan’Andriamanitra varavarana ho an’ny teny, hilazanay ny zavamiafina izay an’i Kristy*, sady izany no efa namatorana ahy rahateo

⁴mba haharihariko tsara izany araka izay tokony hitenenako.

⁵Mandehana amin’ny fahendrena amin’izay eo ivelany, hararaoty ny fotoana.

⁶Aoka ny fiteninareo ho amin’ny fahasoavana mandrakariva, ho mamy sira, mba ho fantatrareo izay tokony havalinareo ny olona rehetra.

⁷Ny momba ahy rehetra dia holazain’i Tikiko aminareo, ilay rahalahy malala sy mpanompo mahatoky ary namako manompo ao amin’ny Tompo.

⁸Ny anton’ny nanirahako azy ho atỳ aminareo indrindra dia ny hahafantaranareo ny momba anay sy ny mba hampaherezany ny fonareo.

⁹Nirahiko koa i Onesimosy, rahalahy mahatoky sy malala izay avy aminareo; hampahafantatra anareo ny zavatra rehetra atỳ izy roa lahy.

¹⁰Manao veloma anareo i Aristarko, mpiara-mifatotra amiko sy i Marka, havan’i Barnabasy; efa nomena toromarika momba azy ianareo ka raha tonga atỳ aminareo izy dia raiso.

¹¹Raiso toa izany koa i Jesosy, izay antsoina hoe Josto. Avy amin’ny voafora ireo. Ireo ihany no mpiara-miasa amiko hampandroso ny fanjakan’Andriamanitra sady tonga fampiononana ahy.

¹²Manao veloma anareo i Epafra, ilay avy aminareo sady mpanompon’i Kristy* Jesosy ary mikely aina mandrakariva amin’ny fangatahana ho anareo, mba hijoro amin’ny fahafenoana ianareo sady hahatanteraka izay rehetra sitrapon’Andriamanitra.

¹³Vavolombelony aho fa mikely aina fatratra ho anareo sy ho an’ny any Laodikia ary ho an’ny any Hierapolia izy.

¹⁴Manao veloma anareo i Lioka malala, ilay mpitsabo, sy i Demasy.

¹⁵Manaova veloma ny rahalahy any Laodikia ary i Nimfa sy ny fiangonana[3] ao an-tranony.

¹⁶Rehefa voavaky atỳ aminareo ity epistily ity dia ataovy koa izay hamakiana azy ao amin’ny fiangonan’ny Laodikiana; ary vakionareo kosa ilay avy amin’ny Laodikiana.

¹⁷Ary lazao amin’i Arkipo hoe: Tandremo ny fanompoana izay noraisinao tao amin’ny Tompo mba hahatanterahanao izany.

¹⁸Ity no veloma ataon’ny tanako, izaho Paoly. Tsarovy ny fifatorako. Ho aminareo anie ny fahasoavana.