Read La Bible en Malgache 1Tesaloniana 1 Bible Online

1Tesaloniana 1 - La Bible en Malgache bible

1Tesaloniana 1

¹I Paoly sy i Silasy ary i Timoty no mamangy ny fiangonan’ny Tesaloniana, izay ao amin’Andriamanitra Ray sy Jesosy Kristy* Tompo: Ho aminareo anie ny fahasoavana sy ny fiadanana!

²Misaotra an’Andriamanitra mandrakariva izahay ny aminareo rehetra ka manonona anareo amin’ny fivavahanay

³sady tsy mitsahatra mahatsiaro ny asanareo amin’ny finoana sy ny fikelezanareo aina amin’ny fitiavana ary ny faharetanareo amin’ny fanantenana an’i Jesosy Kristy* Tompontsika eo imason’Andriamanitra Raintsika.

⁴Fantatray, ry rahalahy malalan’Andriamanitra, ny fifidianana anareo,

⁵fa tsy tonga teo aminareo tamin’ny teny ihany ny Filazantsara torinay fa tamin’ny hery koa sy ny Fanahy Masina ary ny fahatokiana be. Efa fantatrareo rahateo ny fitondrantenanay teo aminareo mikasika anareo.

⁶Efa nanahaka anay sy ny Tompo ianareo satria nandray ny teny tamin’ny fahoriana be mbamin’ny hafaliana avy amin’ny Fanahy Masina

⁷ka tonga fianarana ho an’ny mino rehetra any Makedonia sy Akaia ianareo.

⁸Fa avy tao aminareo no nanakoako ny tenin’ny Tompo, tsy tany Makedonia sy Akaia ihany fa teny tontolo eny no nielezan’ny lazan’ny finoanareo an’Andriamanitra ka tsy misy holazainay intsony.

⁹Fa ireny ihany no milaza ny aminay, dia izay nahazoanay miditra ho atỳ aminareo sy ny nialanareo tamin’ny sampy ka niverenanareo tamin’Andriamanitra mba hanompo an’Andriamanitra velona sy marina,

¹⁰ary mba hiandry ny Zanany avy any an-danitra, izay natsangany tamin’ny maty, dia Jesosy izay mpanafaka antsika amin’ny fahatezerana ho avy.