Read La Bible en Malgache 1Tesaloniana 3 Bible Online

1Tesaloniana 3 - La Bible en Malgache bible

1Tesaloniana 3

¹Ary tamin’izany, rehefa tsy aritray intsony, dia nataonay fa mety ny hijanona irery tany Atena

²ka nirahinay i Timoty, rahalahinay sady mpanompon’Andriamanitra amin’ny Filazantsaran’i Kristy, mba hampahery sy hampirisika anareo amin’ny finoanareo,

³mba tsy hisy ho taitra amin’izao fahoriana izao; fa ny tenanareo dia mahalala fa ho amin’izao no nanendrena antsika.

⁴Fa fony teo aminareo aza izahay dia nilaza taminareo rahateo fa tsy maintsy hampahorina isika; dia izany tokoa no nitranga sady fantatrareo fa ho izay.

⁵Noho izany koa, rehefa tsy naharitra intsony aho, dia nandefa iraka mba hahafantarako ny finoanareo, fandrao naka fanahy anareo ny mpaka fanahy ka ho foana izay nikelezanay aina.

⁶Izao anefa dia tonga atỳ aminay i Timoty, rehefa avy tany aminareo ka milaza vaovao mahafaly aminay ny amin’ny finoanareo sy ny fitiavanareo ary ny fahatsiarovanareo tsara anay mandrakariva, fa maniry hahita anay indrindra ianareo, tahaka anay ta hahita anareo koa.

⁷Noho izany, ry rahalahy, dia nampionona anay teo amin’ny fahaterenay sy ny fahorianay rehetra ny finoanareo;

⁸fa velona izahay ankehitriny raha mitoetra tsara ao amin’ny Tompo ianareo.

⁹Fa inona no saotra azonay havaly an’Andriamanitra noho ny fifalianay rehetra noho ny aminareo eo anatrehan’Andriamanitray?

¹⁰Mangataka fatratra andro aman’alina hahita ny tavanareo sy hahatanteraka izay tsy ampy amin’ny finoanareo izahay.

¹¹Handamina ny lalanay ho atỳ aminareo anie Andriamanitra Raintsika sy Jesosy Tompontsika.

¹²Ary hampitombo sy hampandroso anareo amin’ny fifankatiavana sy ny fitiavana ny olona rehetra anie ny Tompo, dia tahaka ny itiavanay anareo koa

¹³mba hampiorina ny fonareo tsy hanan-tsiny amin’ny fahamasinana eo anatrehan’Andriamanitra Raintsika amin’ny fiavian’i Jesosy Tompontsika mbamin’ny olo-masiny rehetra.