Read La Bible en Malgache 1Tesaloniana 4 Bible Online

1Tesaloniana 4 - La Bible en Malgache bible

1Tesaloniana 4

¹Farany, ry rahalahy, dia mangataka aminareo sy mananatra anareo ao amin’i Jesosy Tompo izahay, mba ho araka izay nampianarinay anareo no fandehananareo, mba hankasitrahan’Andriamanitra; koa arakaraka ny andehananareo ihany no hitomboanareo bebe kokoa.

²Fa fantatrareo ny didy nomenay anareo avy tamin’i Jesosy Tompo.

³Fa izao no sitrapon’Andriamanitra dia ny hanamasinana anareo ka hifadianareo ny fijangajangana;

⁴mba samy hahafantatra izay hahazoanareo vady amin’ny fahamasinana sy ny voninahitra ianareo,

⁵tsy amin’ny filana fotsiny, tahaka ny Jentilisa* izay tsy mahalala an’Andriamanitra;

⁶aoka tsy hisy hanao saina hifetsy ny rahalahiny amin’izany raharaha izany; fa ny Tompo no mpamaly ny amin’izany zavatra rehetra izany, toy ny nolazainay sy nambaranay taminareo ihany.

⁷Fa tsy niantso antsika ho amin’ny fahalotoana Andriamanitra fa amin’ny fahamasinana.

⁸Koa izay mandà dia tsy olona no laviny fa Andriamanitra izay manome anareo ny Fanahiny Masina.

⁹Fa ny amin’ny fifankatiavan’ny mpirahalahy dia tsy misy tokony hosoratako aminareo satria ny tenanareo dia ampianarin’Andriamanitra hifankatia.

¹⁰Fa manao izany ihany ianareo amin’ny rahalahy rehetra manerana an’i Makedonia. Nefa mananatra anareo ihany izahay, ry rahalahy, mba hitombo bebe kokoa ianareo,

¹¹ary mba hokendrenareo ny ho tafatoetra tsara sy hitandrina ny raharahanareo ary hiasa amin’ny tananareo araka izay nandidianay anareo,

¹²mba handehananareo amin’izay fitondrantena mahamendrika amin’ny eo ivelany ka tsy hiankina na amin’iza na amin’iza ianareo.

¹³Fa tsy tianay tsy ho fantatrareo, ry rahalahy, ny amin’izay efa nodimandry mba tsy halahelovanareo tahaka ny sasany izay tsy manana fanantenana.

¹⁴Fa raha inoantsika fa efa maty Jesosy sady efa nitsangana indray dia toy izany koa no hitondran’Andriamanitra izay efa nodimandry tao amin’i Jesosy hiaraka Aminy.

¹⁵Fa izao no lazainay aminareo amin’ny tenin’ny Tompo: Isika, izay velona ka mbola ho eo amin’ny andro hiavian’ny Tompo, dia tsy mba hialoha izay efa nodimandry tsy akory.

¹⁶Fa ny Tompo, Izy tenany, no hidina avy any an-danitra, miaraka amin’ny baiko sy ny feon’ny arikanjely ary ny trompetran’Andriamanitra, koa izay maty ao amin’i Kristy* no hitsangana aloha;

¹⁷ary rehefa afaka izany dia isika izay velona ka mbola ho eo no hakarina hiaraka amin’ireo ho eny amin’ny rahona hitsena ny Tompo any amin’ny habakabaka; dia ho any amin’ny Tompo mandrakariva isika.

¹⁸Koa dia mifampionòna ianareo amin’ireo teny ireo.