Read La Bible en Malgache 1Tesaloniana 5 Bible Online

1Tesaloniana 5 - La Bible en Malgache bible

1Tesaloniana 5

¹Fa ny amin’ny andro sy ny fotoana, ry rahalahy, dia tsy misy tokony hosoratako aminareo

²satria mahalala marimarina ianareo fa ho avy toy ny mpangalatra amin’ny alina ny andron’ny Tompo.

³Raha misy olona milaza hoe: Miadana sy mandry fehizay, dia hanjo azy tampoka ny fandringanana, toy ny fahararian’ny vehivavy raha miteraka ka tsy ho afa-mandositra mihitsy izy.

⁴Fa ianareo, ry rahalahy, dia tsy ao amin’ny maizina ka hahatratra anareo toy ny mpangalatra izany andro izany.

⁵Fa ianareo rehetra dia zanaky ny mazava sy zanaky ny andro; tsy an’ny alina na an’ny maizina isika.

⁶Koa dia aza mba matory toy ny sasany isika fa aoka hiambina ka hahonon-tena.

⁷Fa izay matory dia matory amin’ny alina ary izay mamo dia mamo amin’ny alina.

⁸Fa satria an’ny andro isika dia aoka hahonon-tena ka hitafy ny finoana sy ny fitiavana ho fiarovan-tratra ary ny fanantenana ny famonjena ho fiarovan-doha.

⁹Fa Andriamanitra tsy nanendry antsika ho amin’ny fahatezerana fa mba hahazo famonjena amin’ny alalan’i Jesosy Kristy* Tompontsika,

¹⁰izay maty hamonjy antsika, mba hiara-belona Aminy isika, na mahatsiaro na matory.

¹¹Koa mifampahereza sy mifananara, tahaka ny ataonareo ihany.

¹²Mangataka aminareo izahay, ry rahalahy, mba hekenareo izay mikely aina eo aminareo sy ireo mitondra anareo ao amin’ny Tompo ary ireo mananatra anareo.

¹³Aoka mba hohajainareo indrindra amin’ny fitiavana izy noho ny asany. Mihavàna tsara ianareo.

¹⁴Ary mananatra anareo izahay, ry rahalahy: Anaro izay tsy mitoetra tsara, omeo toky ny saro-tahotra, ampaherezo ny reraka, mandefera amin’ny olona rehetra.

¹⁵Tandremo mba tsy hisy hamaly ratsy olona fa miezaha mandrakariva hitady izay tsara, na amin’ny namanareo na amin’ny olona rehetra.

¹⁶Mifalia mandrakariva.

¹⁷Mivavaha ka aza mitsahatra.

¹⁸Misaora amin’ny zavatra rehetra fa izany no sitrapon’Andriamanitra ao amin’i Kristy* Jesosy ho anareo.

¹⁹Aza mamono ny Fanahy.

²⁰Aza manao tsinontsinona ny faminaniana.

²¹Fantaro ny zavatra rehetra; hazòny mafy izay tsara.

²²Fadio ny fanao ratsy rehetra.

²³Andriamanitry ny fiadanana anie hanamasina anareo manontolo ka ho voatahiry avokoa ny fanahinareo sy ny ainareo ary ny tenanareo ho tanteraka ka tsy hanan-tsiny amin’ny fiavian’i Jesosy Kristy Tompontsika.

²⁴Mahatoky izay miantso anareo sady Izy ihany no hanatanteraka izany.

²⁵Ry rahalahy, mivavaha koa ho anay.

²⁶Ataovy veloma amin’ny fanorohana masina ny rahalahy rehetra.

²⁷Mampianiana anareo amin’ny Tompo aho mba hovakina amin’ny rahalahy masina rehetra ity epistily ity.

²⁸Ho aminareo anie ny fahasoavan’i Jesosy Kristy Tompontsika.