Read La Bible en Malgache Josoa 13 Bible Online

Josoa 13 - La Bible en Malgache bible

Josoa 13

¹Efa zokiolona sady nandroso fahanterana i Josoa ka hoy NY TOMPO taminy: Efa zokiolona ianao ka mandroso fahanterana nefa be dia be ny tany sisa tsy mbola azo.

²Izao no tany sisa tsy mbola azo: Ny tany rehetra an’ny Filistina sy ny Gesorita rehetra,

³hatrany Sihora izay atsinanan’i Ejipta, ka hatrany amin’ny sisintanin’i Ekrona eo avaratra izay isaina ho an’ny Kananita, an’ireo mpanjaka dimy amin’ny Filistina, sy ny Gazita, ny Asdodita, ny Askelonita, ny Gatita, ny Ekronita ary ny Avita

⁴any atsimo, dia ny tanin’ny Kananita rehetra sy i Meara izay an’ny Sidoniana, hatrany Afeka ka hatrany amin’ny sisintanin’ny Amorita,

⁵ary ny tanin’ny Gebalita sy i Libanona rehetra any atsinanana, hatrany Baala-Gada eo am-pototry ny tendrombohitra Hermona ka hatrany akaikin’i Hamata,

⁶ary ny mponina rehetra any amin’ny havoana hatrany Libanona ka hatrany Misrefota-Maima, dia ny Sidoniana rehetra. Izaho no handroaka kanefa zarao amin’ny antsapaka ho lovan’ny Zanak’Israely izy ireny araka izay nandidiako anao.

⁷Ary ankehitriny, zarao izao tany izao ho lovan’ny foko sivy sy ny antsasaky ny fokon’i Manase.

⁸Niaraka tamin’ireo koa no nahazoan’ny Robenita sy ny Gadita ny lovany, dia ilay nomen’i Mosesy azy any andafy atsinanan’i Jordana, araka izay nomen’i Mosesy, mpanompon’NY TOMPO, azy,

⁹dia hatrany Aroera izay eo amoron’ny lohasahan-driaka Arnona, ny tanàna izay eo afovoan’ny lohasaha sy ny tany lemaka rehetra any Medeba ka hatrany Dibona,

¹⁰ny tanàna rehetra izay an’i Sihona, mpanjakan’ny Amorita, izay nanjaka tany Hesbona, hatrany amin’ny sisintanin’ny taranak’i Amona,

¹¹i Gileada, ny tanin’ny Gesorita, ny Makatita, ny tendrombohitra Hermona rehetra ary i Basana rehetra hatrany Saleka,

¹²dia ny fanjakana rehetra an’i Oga tany Basana, izay nanjaka tany Astarota sy Edrehy, izy ihany no sisa tamin’ny Refaìta fa resin’i Mosesy ireny ka noroahiny.

¹³Kanefa tsy mba noroahin’ny Zanak’Israely ny Gesorita sy ny Makatita fa mitoetra eo amin’ny Zanak’Israely mandraka androany izy ireo.

¹⁴Ny fokon’i Levy ihany no tsy nomeny lova; fa ny fanatitra levonina amin’ny afo ho an’NY TOMPO, Andriamanitry ny Israely, no lovany araka izay nolazainy taminy.

¹⁵Ary nomen’i Mosesy lova koa ny fokon’i Robena araka ny fianakaviany.

¹⁶Ny faritaniny dia hatrany Aroera izay eo amoron’ny lohasahan-driaka Arnona sy ny tanàna izay eo afovoan’ny lohasaha ary ny tany lemaka rehetra any Medeba,

¹⁷dia i Hesbona sy ny tanànany rehetra izay eo amin’ny tany lemaka, i Dibona, i Bamota-Baala, i Bety-Baala-Meona,

¹⁸i Jahaza, i Kedemota, i Mefata,

¹⁹i Kiriataima, i Sibma, i Zareta-Sahara ao amin’ny tendrombohitra mandondona eo ambonin’ny lohasaha,

²⁰i Bety-Peora, ny ao an-tsisin’i Pisga, i Bety-Jesimota,

²¹ary ny tanàna rehetra any amin’ny tany lemaka sy ny fanjakana rehetra an’i Sihona, mpanjakan’ny Amorita, izay nanjaka tany Hesbona satria resin’i Mosesy izy sy ireo andrianan’ny Midianita, dia i Evy, i Rekema, i Zora, i Hora ary i Reba, izay andriana nanoa an’i Sihona ka nitoetra teo amin’ny tany.

²²Ary i Balama, mpisikidy, zanak’i Beora, dia anisan’ireo izay novonoin’ny Zanak’Israely tamin’ny sabatra.

²³Ny sisintanin’ny taranak’i Robena dia ny amoron’i Jordana. Izay no lovan’ny taranak’i Robena araka ny fokony, dia ny tanàna mbamin’ny vohitra miankina aminy.

²⁴Nomen’i Mosesy koa ny fokon’i Gada, dia ny taranak’i Gada araka ny fianakaviany.

²⁵Ary ny faritaniny dia i Jazera sy ny tanàna rehetra any Gileada, ny antsasaky ny tanin’ny taranak’i Amona, hatrany Aroera, izay tandrifin’i Raba,

²⁶hatrany Hesbona ka hatrany Ramata-Mizpa sy i Betonima ary hatrany Mahanaima ka hatrany amin’ny faritanin’i Debira;

²⁷ary tao amin’ny lohasaha, i Bety-Harama, i Bety-Nimra, i Sokota, i Zafona sy ny sisa tamin’ny fanjakan’i Sihona, mpanjakan’i Hesbona, ary ny moron’i Jordana hatramin’ny moron’ny ranomasina Kinereta, any andafy atsinanan’i Jordana.

²⁸Izany no lovan’ny taranak’i Gada araka ny fokony, dia ny tanàna mbamin’ny vohitra miankina aminy.

²⁹Nomen’i Mosesy koa ny antsasaky ny fokon’i Manase. Toy izao no an’ny antsasaky ny fokon’i Manase araka ny fianakaviany avy:

³⁰Ny faritaniny hatrany Mahanaima, dia i Basana manontolo, ny fanjakana rehetra an’i Oga, mpanjakan’i Basana, ary ny tanàna madinik’i Jaìra an’ny mpitoetra an-tranolay izay any Basana, dia tanàna enimpolo.

³¹Ary ny antsasak’i Gileada sy i Astarota ary i Edrehy, tanàna ao amin’ny fanjakan’i Oga any Basana, dia an’ny taranak’i Makira, zanak’i Manase, dia ho an’ny antsasaky ny taranak’i Makira araka ny fokony.

³²Ireo no voazaran’i Mosesy ho lova tany amin’ny lemak’i Moaba tao andafy atsinanan’i Jordana tandrifin’i Jeriko.

³³Tsy mba nomen’i Mosesy lova anefa ny fokon’i Levy; fa NY TOMPO, Andriamanitry ny Israely, no lovany, araka izay efa nolazainy taminy.