Read La Bible en Malgache Josoa 16 Bible Online

Josoa 16 - La Bible en Malgache bible

Josoa 16

¹Ny faritry ny tany azon’ny taranak’i Josefa tamin’ny antsapaka dia hatrany Jordana tandrifin’i Jeriko, dia tao amin’ny ranon’i Jeriko atsinanana, hatrany amin’ny tany efitra izay fiakarana avy any Jeriko, mamakivaky ny tany be havoana any Betela,

²hatreo Betela ka hatrany Lozy, nandroso hatrany amin’ny sisintanin’ny Arkita any Atarota,

³nidina niankandrefana nahazo ny sisintanin’ny Jafleta ka hatramin’ny sisintanin’i Bety-Horona ambany sy i Gezera, nihatra tamin’ny ranomasina.

⁴Dia nandray ny lovany i Manase sy i Efraima, taranak’i Josefa.

⁵Ny sisintanin’ny taranak’i Efraima araka ny fokony kosa dia izao: Ny sisintany atsinanana amin’ny lovany dia hatrany Atarota-Adara ka hatrany Bety-Horona ambony.

⁶Ary ny sisintaniny dia nandroso niankandrefana hatrany avaratr’i Mikmeta, niolaka niantsinanana hatrany Tanata-Silo, nihoatra eo atsinanany hatrany Janoha,

⁷nidina hatrany Janoha, hatrany Atarota sy Narata, nipaka hatrany Jeriko ary nihatra tany Jordana.

⁸Avy ao Tapoa, ny sisintany dia miantoraka mankany andrefana hatrany amin’ny lohasahan-driakan’i Kana ka mihatra amin’ny ranomasina. Izany no lovan’ny foko taranak’i Efraima araka ny fianakaviany avy,

⁹mbamin’ny tanàna natokana ho an’ny taranak’i Efraima teo amin’ny lovan’ny taranak’i Manase koa, dia ny tanàna rehetra mbamin’ny vohitra miankina aminy.

¹⁰Ary tsy nandroaka ny Kananita izay nonina tany Gezera izy; fa monina eo amin’i Efraima ny Kananita mandraka androany ka ampanaovina fanompoana.