Read La Bible en Malgache Josoa 2 Bible Online

Josoa 2 - La Bible en Malgache bible

Josoa 2

¹Ary naniraka mangingina mpisafo tany roa lahy avy tany Sitima i Josoa, zanak’i Nona, ka niteny taminy hoe: Mandehana zahao ny tany, indrindra fa i Jeriko. Dia niainga izy roa lahy ary niditra tao an-tranon’ny vehivavy janga iray antsoina hoe Rahaba ka nandry tao.

²Ary nisy nilaza tamin’ny mpanjakan’i Jeriko hoe: Injao, misy olona avy tamin’ny Zanak’Israely tonga atỳ izao alina izao hisafo ny tany.

³Dia nandefa iraka tao amin’i Rahaba ny mpanjakan’i Jeriko hiteny hoe: Avoahy ireo lehilahy tonga ato an-tranonao ireo fa hisafo ny tany manontolo no niaviany.

⁴Nalain-dRavehivavy anefa izy roa lahy ka nafeniny ary hoy izy: Tonga tatỳ amiko ihany tokoa ireny lehilahy ireny nefa tsy fantatro hoe avy aiza izy.

⁵Rehefa maizina ny andro ary hohidina ny vavahady dia lasa nandeha izy ka tsy fantatro indray izay nalehany. Enjeho haingana izy fa ho tratranareo.

⁶Kanjo efa nampiakarin-dRavehivavy tany an-tampon-trano* izy ireo ka nafeniny tao amin’ny tahon-drongony izay nalahany teo an-tampon-trano.

⁷Ary ireo olona dia nanenjika azy tamin’ny lalana mankany Jordana hatrany amin’ny fitàna. Ary rehefa lasa nandeha izay nanenjika azy dia nohidina ny vavahady.

⁸Raha mbola tsy natory izy roa lahy dia niakatra nankao aminy tao an-tampon-trano Ravehivavy

⁹ka niteny taminy hoe: Fantatro fa efa nomen’NY TOMPO anareo ny tany, koa efa mahazo anay ny tahotra anareo sady ketraka ny mponina rehetra amin’ny tany noho ny tahotra anareo.

¹⁰Fa efa renay ny nanamainan’NY TOMPO ny Ranomasina Mena teo anoloanareo tamin’ny nivoahanareo avy tany Ejipta; renay koa izay nataonareo tamin’ny mpanjaka Amorita roa lahy izay tany andafin’i Jordana, dia i Sihona sy i Oga, izay nataonareo ho toy ny zavatra voaozona.

¹¹Ny fandrenesanay ireo dia nahaketraka ny fonay ka very hevitra avokoa izahay noho ny aminareo; fa NY TOMPO Andriamanitrareo, Izy no Andriamanitra any amin’ny lanitra ambony sy etỳ amin’ny tany ambany.

¹²Koa ankehitriny, miangavy anareo aho, mba ianiano amin’NY TOMPO, fa araka ny namindrako fo taminareo no mba hamindranareo fo amin’ny ankohonan’ny raiko kosa, koa omeo famantarana azo antoka aho

¹³fa hovelominareo ny raiko sy ny reniko mbamin’ny anadahiko sy ny rahavaviko ary izay rehetra mety ho azy; ary hamonjy ny ainay tsy ho faty ianareo.

¹⁴Dia hoy izy roa lahy taminy: Ny ainay no ho faty hisolo anareo raha tsy hambaranareo izao raharahanay izao. Raha omen’NY TOMPO anay ny tany dia hamindra fo sy hanao izay marina aminao izahay.

¹⁵Ary nampidina azy tamin’ny tady mahazaka avy teo amin’ny varavarankely Ravehivavy; fa teo amin’ny mandan’ny tanàna ny tranony ary teo amin’ny manda no nitoerany.

¹⁶Dia hoy Ravehivavy tamin’izy roa lahy: Mandehana any an-tendrombohitra fandrao hifanena amin’ny mpanenjika ianareo ka miere any mandritra ny hateloana mandra-piveriny. Rehefa afaka izany, vao manohy ny dia amin’izay halehanareo ianareo.

¹⁷Ary hoy izy roa lahy taminy: Izao no tsy hanananay tsiny ny amin’izany fianianana nampianianinao anay izany:

¹⁸Indro, rehefa tonga eto amin’ny tany izahay dia hafehinao eo amin’ny varavarankely izay nampidinanao anay io tady kely jaky io dia hovorinao ho ao an-tranonao ny rainao sy ny reninao ary ny anadahinao mbamin’ny ankohonan’ny rainao rehetra;

¹⁹ary izay rehetra mivoaka avy eo am-baravaran’ny tranonao ho eny ivelany dia ho eo an-dohany ihany ny rany ary izahay dia tsy hanan-tsiny; fa izay rehetra mitoetra ao aminao ao an-trano kosa dia ho eo an-dohanay ny rany raha toa ka misy olona mikasi-tanana azy;

²⁰fa raha toa ka hambarambaranao kosa izao raharahanay izao dia ho afaka amin’ny fianianana izay nampianianinao anay izahay.

²¹Dia hoy Ravehivavy: Eny ary fa marina izany. Dia nampandehaniny izy roa lahy ka lasa nandeha; dia nafehiny teo amin’ny varavarankely ilay tady kely jaky.

²²Dia nandeha izy roa lahy ka nankany an-tendrombohitra ary nitoetra tany hateloana mandra-piverin’ny mpanenjika; nitady azy tamin’ny lalana rehetra ny mpanenjika nefa tsy nahita.

²³Dia niverina izy roa lahy ka nidina avy tany an-tendrombohitra dia nita ny ony ary nankany amin’i Josoa, zanak’i Nona, ka nilaza ny zavatra rehetra izay nihatra taminy.

²⁴Hoy izy ireo tamin’i Josoa: Efa natolotry NY TOMPO eo an-tanantsika tokoa ny tany rehetra; ary ketraka noho ny tahotra antsika ny mponina rehetra amin’ny tany.