Read La Bible en Malgache Josoa 21 Bible Online

Josoa 21 - La Bible en Malgache bible

Josoa 21

¹Ary ny lohan’ny fianakaviana tamin’ny levita* dia nanatona an’i Eleazara mpisorona sy i Josoa, zanak’i Nona, ary ny lohan’ny fianakaviana tamin’ny fokon’ny Zanak’Israely,

²ka niteny taminy tao Silo tao amin’ny tany Kanana hoe: NY TOMPO efa nampandidy an’i Mosesy mba homena tanàna hitoerana sy tany manodidina azy ho an’ny biby fiompinay izahay.

³Avy tamin’ny lovany no nanomezan’ny Zanak’Israely ny levita ireny tanàna ireny sy ny tany manodidina azy avy, araka ny didin’NY TOMPO.

⁴Dia nahazo anjara tamin’ny antsapaka ny fianakavian’ny Kehatita; ny anjara azon’ny taranak’i Arona mpisorona isan’ny levita dia tanàna telo amby folo, avy tamin’ny fokon’i Joda sy ny fokon’i Simeona ary ny fokon’i Benjamina.

⁵Ny anjara azon’ny taranak’i Kehata sisa tamin’ny antsapaka dia tanàna folo, avy tamin’ny fokon’i Efraima sy ny fokon’i Dana ary ny antsasaky ny fokon’i Manase.

⁶Ny anjara azon’ny taranak’i Gersona tamin’ny antsapaka dia tanàna telo amby folo, avy tamin’ny fokon’Isakara sy ny fokon’i Asera sy ny fokon’i Naftaly ary tamin’ny antsasaky ny fokon’i Manase any Basana.

⁷Ny anjara azon’ny taranak’i Merary isam-pokony tamin’ny antsapaka dia tanàna roa amby folo, avy tamin’ny fokon’i Robena sy ny fokon’i Gada ary fokon’i Zebolona.

⁸Nomen’ny Zanak’Israely ny levita tamin’ny antsapaka ireo tanàna ireo sy ny tany manodidina azy avy, araka izay nandidian’NY TOMPO tamin’ny alalan’i Mosesy.

⁹Nomen’ny zanak’Israely avy tamin’ny foko taranak’i Joda sy ny foko taranak’i Simeona ireto tanàna hotononina anarana ireto,

¹⁰izay azon’ny taranak’i Arona, isam-pianakavian’ny taranak’i Kehata, amin’ny taranak’i Levy; fa azy ny anjara voalohany tamin’ny antsapaka.

¹¹Dia nomeny azy Kiriata-Arba na ny tanànan’i Arba, rain’i Anàka, dia i Hebrona izany, any amin’ny tany be havoana any Joda, mbamin’ny tany manodidina azy.

¹²Fa ny saha momba ny tanàna sy ny vohitra miankina aminy dia nomeny ho lovan’i Kaleba, zanak’i Jefone.

¹³Nomeny ny taranak’i Arona mpisorona i Hebrona sy ny tany manodidina azy, ho tanàna fialofana ho an’izay nahafaty olona, nanampiny azy i Libna sy ny tany manodidina azy,

¹⁴i Jatira sy ny tany manodidina azy, i Estemoa sy ny tany manodidina azy,

¹⁵i Holona sy ny tany manodidina azy, i Debira sy ny tany manodidina azy,

¹⁶i Aina sy ny tany manodidina azy, i Jota sy ny tany manodidina azy, i Bety-Semesy sy ny tany manodidina azy: Tanàna sivy avy tamin’ireo foko roa ireo;

¹⁷ary avy tamin’ny fokon’i Benjamina dia i Gibeona sy ny tany manodidina azy, i Geba sy ny tany manodidina azy,

¹⁸i Anatota sy ny tany manodidina azy, i Almona sy ny tany manodidina azy: Tanàna efatra.

¹⁹Ny tanàna rehetra an’ny mpisorona, taranak’i Arona, dia telo amby folo sy ny tany manodidina azy avy.

²⁰Ny amin’ny taranak’i Kehata, dia ny levita sisa tamin’ny taranak’i Kehata, ny tanàna azony tamin’ny antsapaka dia avy tamin’ny fokon’i Efraima.

²¹Nomen’ny zanak’Israely azy i Sekema sy ny tany manodidina azy any amin’ny tany be havoana any Efraima, ho tanàna fialofana ho an’izay nahafaty olona, niampy an’i Gezera sy ny tany manodidina azy,

²²i Kibzaima sy ny tany manodidina azy, i Bety-Horona sy ny tany manodidina azy: Tanàna efatra;

²³ary avy tamin’ny fokon’i Dana, dia i Elteke sy ny tany manodidina azy, i Gibetona sy ny tany manodidina azy,

²⁴i Aialona sy ny tany manodidina azy, i Gata-Rimona sy ny tany manodidina azy: Tanàna efatra;

²⁵avy tamin’ny antsasaky ny fokon’i Manase, dia i Tanàka sy ny tany manodidina azy, i Gata-Rimona sy ny tany manodidina azy: Tanàna roa.

²⁶Ny tanàna rehetra azon’ny fianakavian’ny taranak’i Kehata sisa dia folo, miampy ny tany manodidina azy avy.

²⁷Izao no azon’ny taranak’i Gersona, isan’ny taranaky ny levita; avy tamin’ny antsasaky ny fokon’i Manase, dia i Golana any Basana sy ny tany manodidina azy, ho tanàna fialofana ho an’izay nahafaty olona, niampy an’i Bestera sy ny tany manodidina azy: Tanàna roa;

²⁸ary avy tamin’ny fokon’Isakara dia i Kisiona sy ny tany manodidina azy, i Daberata sy ny tany manodidina azy,

²⁹i Jarmota sy ny tany manodidina azy, i Eny-Ganima sy ny tany manodidina azy: Tanàna efatra;

³⁰ary avy tamin’ny fokon’i Asera dia i Misala sy ny tany manodidina azy, i Abdona sy ny tany manodidina azy,

³¹i Helkata sy ny tany manodidina azy, i Rehoba sy ny tany manodidina azy: Tanàna efatra;

³²avy tamin’ny fokon’i Naftaly dia i Kadesy any Galilia sy ny tany manodidina azy, ho tanàna fialofana ho an’izay nahafaty olona, niampy an’i Hamota-Dora sy ny tany manodidina azy, i Kartana sy ny tany manodidina azy: Tanàna telo.

³³Ny tanàna rehetra an’ny Gersonita araka ny fianakaviany dia telo amby folo sy ny tany manodidina azy avy.

³⁴Izao no azon’ny fianakavian’ny taranak’i Merary, izay levita sisa: Avy tamin’ny fokon’i Zebolona dia i Jokneama sy ny tany manodidina azy, i Karta sy ny tany manodidina azy,

³⁵i Dimna sy ny tany manodidina azy, i Nahalola sy ny tany manodidina azy: Tanàna efatra;

³⁶avy tamin’ny fokon’i Robena dia i Bezera sy ny tany manodidina azy, i Jahaza sy ny tany manodidina azy,

³⁷i Kedemota sy ny tany manodidina azy, i Mefata sy ny tany manodidina azy: Tanàna efatra;

³⁸ary avy tamin’ny fokon’i Gada, dia i Ramota any Gileada sy ny tany manodidina azy, ho tanàna fialofana ho an’izay nahafaty olona, ao koa i Mahanaima sy ny tany manodidina azy,

³⁹i Hesbona sy ny tany manodidina azy, i Jazera sy ny tany manodidina azy: Tanàna efatra izy rehetra.

⁴⁰Ny tanàna rehetra an’ny taranak’i Merary araka ny fianakaviany, izay sisa tamin’ny fianakavian’ny levita, dia tanàna roa amby folo no anjara azony tamin’ny antsapaka.

⁴¹Ny tanàna rehetra an’ny levita tao anatin’ny lovan’ny Zanak’Israely dia valo amby efapolo, miampy ny tany manodidina azy avy.

⁴²Ireo tanàna ireo dia samy manana ny taniny manodidina azy avy; tahaka izany avokoa ireo tanàna rehetra ireo.

⁴³Dia nomen’NY TOMPO ny Israely ny tany rehetra izay efa nianianany homena ny razany; ary nolovainy izany ka nonenany.

⁴⁴Dia nomen’NY TOMPO fitsaharana amin’ny manodidina izy, araka izay rehetra nianianany tamin’ny razany, ka tsy nisy lehilahy tamin’ny fahavalony rehetra nahajanona teo anoloany; fa natolotry NY TOMPO teo an-tanany avokoa ny fahavalony rehetra.

⁴⁵Tsy nisy latsaka na dia kely akory aza ny zava-tsoa rehetra izay nolazain’NY TOMPO tamin’ny taranak’Israely; fa tanteraka avokoa izany rehetra izany.