Read La Bible en Malgache Josoa 4 Bible Online

Josoa 4 - La Bible en Malgache bible

Josoa 4

¹Rehefa tafita an’i Jordana avokoa ny olona rehetra dia hoy NY TOMPO tamin’i Josoa:

²Makà lehilahy roa amby folo amin’ny olona, dia iray avy isam-poko,

³ka mandidia azy hoe: Makà vato roa amby folo avy eo afovoan’i Jordana, eo amin’ilay nijoroan’ny tongotry ny mpisorona, dia ento miaraka aminareo ka apetraho eo amin’izay handrianareo anio alina.

⁴Dia nantsoin’i Josoa ny lehilahy roa amby folo izay nofidiny tamin’ny Zanak’Israely, iray avy isam-poko,

⁵ary hoy izy taminy: Mandehana eo alohan’ny vata misy NY TOMPO Andriamanitrareo ho eo afovoan’i Jordana, koa samia maka sy milanja vato iray eny an-tsorony ianareo rehetra, araka ny isan’ny fokon’ny Zanak’Israely,

⁶mba ho famantarana eo aminareo izany. Raha manontany ny zanakareo amin’ny andro ho avy hoe: Inona no anton’ireo vato ireo aminareo?

⁷Dia holazainareo aminy hoe: Tapaka teo anoloan’ny vata misy ny faneken’NY TOMPO ny ranon’i Jordana; eny, tamin’ny nitan’ny vata misy ny Fanekena* an’i Jordana dia tapaka ny rano; ary ho fahatsiarovana mandrakizay ho an’ny Zanak’Israely ireo vato ireo.

⁸Dia nanatanteraka izay nandidian’i Josoa ny Zanak’Israely ka naka vato roa amby folo teo afovoan’i Jordana, araka izay nolazain’NY TOMPO tamin’i Josoa, araka ny isan’ny fokon’ny Zanak’Israely, ka noentiny nita niaraka taminy ho eo amin’izay nitobiany ireo ka napetrany teo.

⁹Vato roa amby folo no natsangan’i Josoa tao Jordana, teo amin’ilay nijoroan’ny tongotry ny mpisorona izay nitondra ny vata misy ny Fanekena ary mbola ao ihany ireny mandraka androany.

¹⁰Nijanona teo afovoan’i Jordana ny mpisorona izay nitondra ny vata misy ny Fanekena, mandra-pahavitan’ny zavatra rehetra izay nandidian’NY TOMPO an’i Josoa holazaina amin’ny olona, araka izay rehetra nandidian’i Mosesy an’i Josoa; avy eo vao nita haingana ny olona.

¹¹Rehefa tafita avokoa ny olona rehetra dia nita teo anoloan’ny olona koa ny vata misy ny faneken’NY TOMPO sy ireo mpisorona.

¹²Ary ny taranak’i Robena sy ny taranak’i Gada ary ny antsasaky ny fokon’i Manase dia samy efa voaomana hiady ka nita teo alohan’ny Zanak’Israely koa, araka izay efa nolazain’i Mosesy taminy.

¹³Tokony ho lehilahy efatra alina efa voaomana hiady no nita teo anatrehan’NY TOMPO mba hanafika any amin’ny tany ngazana any Jeriko.

¹⁴Tamin’izany andro izany no nanandratan’NY TOMPO an’i Josoa teo imason’ny Israely rehetra; dia natahotra azy ny olona, tahaka ny efa natahorany an’i Mosesy, tamin’ny andro rehetra niainany.

¹⁵Ary hoy NY TOMPO tamin’i Josoa:

¹⁶Mandidia ny mpisorona izay mitondra ny vata misy ny Vavolombelona[1] mba hiakatra hiala ao Jordana.

¹⁷Dia nandidy ny mpisorona i Josoa hoe: Miakara hiala ao Jordana ianareo.

¹⁸Ary rehefa niakatra niala avy tao afovoan’i Jordana ireo mpisorona izay nitondra ny vata misy ny faneken’NY TOMPO ireo ka nanainga ny faladiany ho eo amin’ny tanety dia avy indray ny ranon’i Jordana nankamin’ny fitoerany ka nihoatra ny morony rehetra tahaka ny teo aloha ihany.

¹⁹Tamin’ny andro fahafolo tamin’ny volana voalohany no niakatra niala teo Jordana ny olona ka nitoby tany Gilgala, teo amin’ny sisintany atsinanan’i Jeriko.

²⁰Ireo vato roa amby folo nalainy tao Jordana dia natsangan’i Josoa tany Gilgala.

²¹Dia hoy izy tamin’ny Zanak’Israely: Raha manontany ny rainy ny taranakareo any amin’ny andro ho avy hoe: Inona no anton’ireo vato ireo?

²²Dia hambaranareo aminy hoe: Tamin’ny tany maina no nitan’ny Israely ity Jordana ity.

²³Fa nataon’NY TOMPO Andriamanitrareo maina teo anoloanareo ny lalana falehan’ny rano Jordana mandra-pitanareo, dia tahaka ny nataon’NY TOMPO Andriamanitrareo tamin’ny Ranomasina Mena izay nataony maina teo anoloantsika mandra-pitantsika

²⁴mba ho fantatry ny firenena rehetra ambonin’ny tany fa mahery ny tanan’NY TOMPO ary mba hatahorany mandrakizay NY TOMPO Andriamanitrareo.