Read La Bible en Malgache 2Tesaloniana 1 Bible Online

2Tesaloniana 1 - La Bible en Malgache bible

2Tesaloniana 1

¹I Paoly sy i Silasy ary i Timoty no mamangy ny fiangonan’ny Tesaloniana, izay ao amin’Andriamanitra Raintsika sy Jesosy Kristy* Tompo:

²Ho aminareo anie ny fahasoavana sy ny fiadanana avy amin’Andriamanitra Ray sy Jesosy Kristy Tompo.

³Tsy maintsy misaotra an’Andriamanitra mandrakariva izahay noho ny aminareo, ry rahalahy, fa mendrika hatao izany satria mandroso fatratra ny finoanareo ary mitombo ny fifankatiavanareo rehetra.

⁴Reharehan’ny tenanay eny amin’ny fiangonan’Andriamanitra ianareo noho ny faharetanareo sy ny finoanareo amin’ny fanenjehana rehetra izay manjo anareo sy ny fahoriana izay iaretanareo.

⁵Famantarana ny fitsarana marin’Andriamanitra ireny mba hatao ho mendrika ny fanjakan’Andriamanitra ianareo sady izany rahateo koa no iaretanareo.

⁶Zavatra marina amin’Andriamanitra ny hamaly fahoriana izay mampahory anareo,

⁷ary ny hanome fitsaharana anareo izay ampahorina kosa mbamin’ny tenanay, rehefa hiseho avy any an-danitra Jesosy Tompo, mbamin’ny anjeliny mahery,

⁸amin’ny afo midedadeda, hamaly izay tsy mahalala an’Andriamanitra sy izay tsy manaiky ny Filazantsaran’i Jesosy Tompontsika.

⁹Ireny olona ireny no hiharan’ny famaliana marina, dia fahaverezana mandrakizay, lavitry ny fanatrehan’ny Tompo sy ny voninahitry ny heriny,

¹⁰rehefa tonga Izy mba hankalazaina eo amin’ny olony masina sy hampitolagaga azy eo amin’izay rehetra mino amin’izany andro izany satria ninoana ny fanambarànay taminareo.

¹¹Izany no angatahinay mandrakariva ho anareo mba hataon’Andriamanitsika ho mendrika ny fiantsoana ianareo, ary hotanterahiny amin’ny hery ny fankasitrahana tsara rehetra sy ny asan’ny finoana

¹²mba hankalazaina ao aminareo ny anaran’i Jesosy Tompontsika ary ao Aminy kosa ianareo, araka ny fahasoavan’Andriamanitsika sy Jesosy Kristy* Tompo.