Read La Bible en Malgache 2Tesaloniana 3 Bible Online

2Tesaloniana 3 - La Bible en Malgache bible

2Tesaloniana 3

¹Farany, ry rahalahy, mivavaha ho anay mba handehanan’ny tenin’ny Tompo haingana ka hankalazaina toy izao eo aminareo izao,

²ary mba hovonjena ho afaka amin’ny olona hafahafa sy ratsy fanahy izahay; fa tsy ary manana finoana avokoa ny olona rehetra.

³Fa mahatoky ny Tompo izay hampahery sy hiaro anareo tsy ho azon’ilay ratsy.

⁴Fa izahay dia matoky anareo ao amin’ny Tompo, fa izay zavatra ampanaovinay dia efa ataonareo sady mbola hataonareo ihany koa.

⁵Ny Tompo anie hampitodika ny fonareo ho amin’ny fitiavana an’Andriamanitra sy ho amin’ny faharetan’i Kristy*.

⁶Ary mangataka anareo izahay, ry rahalahy, amin’ny anaran’i Jesosy Kristy* Tompontsika mba hialanareo amin’ny rahalahy rehetra izay tsy mitoetra tsara ka tsy manaraka ny fampianarana natolotra izay noraisiny taminay.

⁷Fa ianareo no mahalala izay tokony hianaranareo aminay; fa nitoetra tsara teo aminareo izahay

⁸ary tsy nihinana foana izay hanin’olona fa niasa andro aman’alina tamin’ny fikelezan’aina sy ny fisasarana mba tsy hahavaky tratra na dia ny iray aminareo akory aza;

⁹tsy hoe tsy manana zo anefa izahay fa ny mba hanoloranay ny tenanay ho fianarana ho anareo.

¹⁰Fa fony mbola teo aminareo ihany aza izahay dia niteny hentitra taminareo hoe: Raha misy tsy mety miasa dia aoka izy tsy hihinana.

¹¹Renay mantsy fa misy ny sasany eo aminareo tsy mitoetra tsara ka tsy miasa akory fa mivezivezy foana miraharaha ny an’olona.

¹²Izay manao toy izany no didianay sy anarinay ao amin’i Jesosy Kristy Tompo mba hiasa tsara am-pilaminana ka hihinana izay azy ihany.

¹³Fa ianareo, ry rahalahy, dia aza ketraka amin’ny fanaovan-tsoa.

¹⁴Raha misy olona tsy manaiky ny teninay amin’ity epistily ity dia mariho izany olona izany ka aza mikambana aminy mba hahamenatra azy.

¹⁵Kanefa aza dia atao fahavalo izy fa anaro toy ny rahalahy.

¹⁶Ary ny Tompon’ny fiadanana anie hanome anareo fiadanana mandrakariva amin’ny zavatra rehetra. Ho aminareo rehetra anie ny Tompo.

¹⁷Ity no veloma ataon’ny tanako, izaho Paoly. Izao no famantarana eo amin’ny epistily rehetra; izao no soratro.

¹⁸Ho aminareo rehetra anie ny fahasoavan’i Jesosy Kristy* Tompontsika.