Read La Bible en Malgache 1Timoty 1 Bible Online

1Timoty 1 - La Bible en Malgache bible

1Timoty 1

¹I Paoly, apostolin’i Kristy* Jesosy araka ny didin’Andriamanitra, Mpamonjy antsika, sy Kristy Jesosy fanantenantsika,

²no mamangy an’i Timoty, tena zanako amin’ny finoana: Ho aminao anie ny fahasoavana, famindrampo, fiadanana avy amin’Andriamanitra Ray sy Kristy Jesosy Tompontsika.

³Araka ny nangatahiko taminao fony aho handeha any Makedonia dia aoka ianao hitoetra any Efesosy mba handraranao ny olona sasany tsy hanao fampianarana hafahafa

⁴na ho variana amin’ny anganongano sy ny tantaram-pirazanana tsy hita lany izay mahatonga adihevitra, fa tsy mampandroso ny fitondrana araka an’Andriamanitra amin’ny finoana ireny.

⁵Fa ny anton’ny didy fandrarana dia fitiavana avy amin’ny fo madio sy ny fieritreretana tsara ary ny finoana tsy mihatsaravelatsihy;

⁶fa fihatsarambelatsihy no nivilian’ny sasany ka nampania ho amin’ny resaka tsy misy antony.

⁷Izy ireny dia te ho mpampiana-dalàna, kanefa tsy fantany akory izay lazainy na izay itompoany.

⁸Fantatsika anefa fa tsara ny lalàna raha entin’ny olona araka izay antony

⁹ka fantany fa tsy ny olona marina no nanaovana ny lalàna fa ny mpandika lalàna sy ny mpikomy, dia ny tsy matahotra an’Andriamanitra sy ny mpanota, ny olona tsy manaja izay masina sy ny olona mpaniratsira, ny mpamono ray sy ny mpamono reny, ny mpamono olona,

¹⁰ny mpijangajanga, ny sodomita, ny mpivarotra olona, ny mpandainga, ny mpanao fianianana mandainga, ary na inona na inona manohitra ny fampianarana tsy misy kilema,

¹¹araka ny Filazantsaran’ny voninahitr’Andriamanitra loharanom-pahasambarana, izay nankinina tamiko.

¹²Izaho dia misaotra an’i Kristy* Jesosy Tompontsika, izay nampahery ahy, fa nataony mahatoky aho ka notendreny ho amin’ny fanompoana,

¹³dia izaho izay mpiteny ratsy fahiny sady mpanenjika sy mpampahory; kanefa nahazo famindrampo aho satria tamin’ny tsy fahalalana noho ny tsy finoana no nanaovako ireny.

¹⁴Fa mitafotafo ny fahasoavan’ny Tompontsika tamin’ny finoana sy ny fitiavana, izay ao amin’i Kristy Jesosy.

¹⁵Mahatoky ka tokony hekena amin’ny fankasitrahana rehetra izao teny izao: Tonga tetỳ ambonin’ny tany Kristy Jesosy hamonjy ny mpanota, ary amin’ireny dia izaho no lohany.

¹⁶Kanefa izao no namindrana fo tamiko, dia ny mba hanehoan’i Jesosy Kristy eo amiko izay lohany, ny fahari-po rehetra ho fianarana ho an’izay hino Azy ka hahazoany ny fiainana mandrakizay.

¹⁷Ary ho an’ny Mpanjaka mandrakizay, tsy mety maty, tsy hita maso, dia ho an’Andriamanitra tokana ihany anie ny laza sy ny voninahitra mandrakizay mandrakizay. Amena.

¹⁸Izao didy izao no omeko anao, ry Timoty zanako, araka ireo faminaniana natao fahiny ny aminao mba hoentinao miady ny ady tsara,

¹⁹amin’ny itananao ny finoana sy ny fieritreretana tsara, izay efa narian’ny sasany, koa toy ny olona vaky sambo izy amin’ny lafin’ny finoana;

²⁰naman’ireny i Himeneo sy i Aleksandra, izay natolotro ho an’i Satana mba hofaizina tsy hiteny ratsy.