Read La Bible en Malgache 1Timoty 2 Bible Online

1Timoty 2 - La Bible en Malgache bible

1Timoty 2

¹Koa mananatra voalohany indrindra aho mba hatao izay fangatahana, fivavahana, fifonana, fisaorana, ho an’ny olona rehetra,

²ho an’ny mpanjaka mbamin’izay rehetra manana fahefana, mba hiainantsika am-piadanana sy mandry fehizay amin’ny fahatahorana an’Andriamanitra sy ny fahamaotinana rehetra.

³Izany no tsara ka ankasitrahina eo imason’Andriamanitra, Mpamonjy antsika,

⁴izay tia ny olona rehetra hovonjena ka ho tonga amin’ny fahalalana ny marina.

⁵Fa iray Andriamanitra ary iray no Mpanalalana amin’Andriamanitra sy ny olona, dia Kristy* Jesosy, izay olona,

⁶sady nanolotra ny tenany ho avotra hisolo ny olona rehetra. Izany no zavatra ho fitory amin’ny fotoana voatendry.

⁷Ho amin’izany no nanendrena ahy ho mpitory sy Apostoly; milaza ny marina aho fa tsy mandainga; ary koa ho mpampianatra ny Jentilisa* amin’ny finoana sy ny fahamarinana.

⁸Koa tiako mba hivavaka eny amin’izay rehetra misy azy eny ny lehilahy ka manandra-tanana masina, tsy amin’ny fahatezerana na amin’ny fifandirana.

⁹Toy izany koa ny vehivavy, hiravaka amin’ny fitafiana mahamendrika mbamin’ny fahamaotinana sy ny fahononan-tena, nefa tsy amin’ny volo mirandrana sy ny volamena, na vatosoa na fitafiana sarobidy,

¹⁰fa amin’ny asa tsara, araka izay mahamendrika ny vehivavy manaiky ny fivavahana amin’Andriamanitra.

¹¹Aoka mba hianatra amin’ny fahanginana ny vehivavy ka hanaiky tsara.

¹²Fa ny vehivavy dia tsy avelako hampianatra na hifehy ny lehilahy fa hangina ihany.

¹³Fa i Adama no natao voalohany, vao i Eva.

¹⁴Ary tsy i Adama no voafitaka fa ny vehivavy no voafitaka ka tonga mpanota.

¹⁵Nefa hovonjena ihany izy amin’ny fiterahan-jaza, raha maharitra amin’ny finoana sy ny fitiavana ary ny fahamasinana mbamin’ny fahononan-tena.