Read La Bible en Malgache 1Timoty 3 Bible Online

1Timoty 3 - La Bible en Malgache bible

1Timoty 3

¹Mahatoky izao teny izao: Raha misy olona maniry ny asan’ny mpitondra fiangonana[1] dia maniry asa tsara izy.

²Koa ny mpitondra fiangonana[2] dia tsy maintsy ho tsy manan-tsiny, manambady tokana, mahonon-tena, hendry, tia filaminana, mampiantrano vahiny, mahay mampianatra,

³tsy mpimamo lian’ady, tsy mpikapoka fa mandefitra, tsy mpila ady, tsy fatra-pitia vola,

⁴mitondra tsara ny ankohonany, mampanaiky ny zanany amin’ny fahamaotinana tsara.

⁵Fa raha misy olona tsy mahay mitondra ny ankohonany, hataony ahoana moa no fikarakarany ny fiangonan’[3]Andriamanitra?

⁶Tsy izay vao avy nanolo-tena ho an’Andriamanitra, fandrao hieboebo foana izy ka ho latsaka amin’ny fanamelohan’ny devoly.

⁷Ary tsy maintsy ho tsara laza koa amin’izay eny ivelany izy, fandrao ho lavo amin’ny fananan-tsiny sy ny fandriky ny devoly.

⁸Ny diakona koa dia toy izany ihany, ho maotina, tsy miroa teny, tsy tia divay be, tsy tia harena maloto,

⁹mitandrina tsara ny zavamiafina ny amin’ny finoana amin’ny fieritreretana madio.

¹⁰Aoka hozahan-toetra aloha ireo, izay vao hanao ny asan’ny diakona izy raha tsy manan-tsiny.

¹¹Ny vehivavy koa dia ho toy izany ihany, ho maotina, tsy mpanendrikendrika, mahonon-tena, mahatoky amin’ny zavatra rehetra.

¹²Aoka hanambady iray ihany ny diakona ary aoka hitondra tsara ny zanany sy ny ankohonany koa izy.

¹³Fa izay efa mahavatra tsara ny asan’ny diakona dia mahazo toerana tsara ho an’ny tenany sy fahatokiana be amin’ny finoana izay ao amin’i Kristy* Jesosy.

¹⁴Izany zavatra izany dia soratako aminao, na dia manantena hankaty aminao haingana aza aho;

¹⁵fa raha tratra ela aho dia fantaro izay fitondrantena mety hatao ao amin’ny tranon’Andriamanitra, dia ny fiangonan’Andriamanitra velona izay andry sy fiorenan’ny fahamarinana.

¹⁶Ary iaraha-manaiky mihitsy fa lehibe ny zavamiafina ny amin’ny toe-panahy araka an’Andriamanitra, dia ilay naseho teo amin’ny nofo, nohamarinina tao amin’ny Fanahy, hitan’ny anjely, notorina tany amin’ny Jentilisa*, ninoana teny amin’izao tontolo izao, nakarina ho any amin’ny voninahitra.