Read La Bible en Malgache 1Timoty 5 Bible Online

1Timoty 5 - La Bible en Malgache bible

1Timoty 5

¹Aza mamely mafy loatra ny lehilahy efa zokiolona fa anaro toy ny ray izy, ny tovolahy dia toy ny rahalahy,

²ny vehivavy efa zokiolona toy ny reny ary ny tovovavy dia toy ny anabavy, amin’ny fahadiovana rehetra.

³Omeo voninahitra ny mpitondratena izay tena mpitondratena tokoa.

⁴Fa raha misy mpitondratena manana zanaka na zafy dia aoka aloha ireo hianatra haneho izay toe-panahy araka an’Andriamanitra amin’ny ao an-tranony ka hamaly soa ny ray aman-dreniny, fa izany no ankasitrahina eo anatrehan’Andriamanitra.

⁵Fa izay tena mpitondratena tokoa ka mipetraka irery dia manantena an’Andriamanitra ka maharitra amin’ny fangatahana sy ny fivavahana andro aman’alina.

⁶Fa izay vehivavy manaram-po amin’ny fahafinaretana dia maty fahavelony.

⁷Izany zavatra izany no ambarao hentitra mba tsy hananany tsiny.

⁸Fa raha misy tsy mikarakara ny ao aminy, indrindra fa ny ankohonany, dia efa nandà ny finoana izy ka ratsy noho ny tsy mino aza.

⁹Ny azo soratana ho isan’ny mpitondratena dia izay tsy latsaky ny enimpolo taona sady nanambady indray mandeha ihany.

¹⁰Tsy maintsy tsara laza amin’ny asa tsara izy: Raha namelon-jaza, raha nampiantrano vahiny, raha nanasa ny tongotry ny olona masina, raha namonjy ny azom-pahoriana, raha nazoto nanatanteraka ny asa tsara rehetra.

¹¹Fa mandava kosa ny mpitondratena mbola tanora; fa rehefa mampitodika azy hanalavitra an’i Kristy* ny faniriany dia ta hanambady indray izy izay.

¹²Koa meloka izy satria nandà ny fanekena nataony teo aloha.

¹³Ankoatra izay dia mianatra ho malaina miasa koa izy ka mandehandeha mitety trano; ary tsy malaina miasa ihany fa mitati-dresaka sy mpandehandeha miraharaha ny an’olona ka manao teny tsy tokony hotenenina.

¹⁴Koa tiako raha hanambady indray ny mpitondratena mbola tanora ary hanan-janaka sy hitondra ny tokantranony ka tsy hanome vahana ny fahavalo hitenenany ratsy azy.

¹⁵Fa efa nivily sahady ny sasany nanaraka an’i Satana.

¹⁶Raha misy vehivavy mpino manana havana mpitondratena dia aoka izy no hikarakara azy, fa aza avela hahavaky tratra ny fiangonana[5] mba hikarakarany izay tena mpitondratena tokoa.

¹⁷Ny loholona[6] izay mahay mitarika dia mendrika ny hahazo fanajana roa heny, indrindra fa izay mikely aina amin’ny teny sy ny fampianarana.

¹⁸Fa hoy ny Soratra Masina: «Aza manakombona ny vavan’ny omby mively vary ianao» (Deo 25.4). Ary koa: «Ny mpiasa dia mendrika hahazo ny karamany» (Lio 10.7).

¹⁹Aza mandray teny hiampangana loholona raha tsy misy vavolombelona roa na telo.

²⁰Izay manota dia anaro eo anatrehan’ny olona rehetra mba hatahotra koa ny sasany.

²¹Mananatra mafy anao aho eo anatrehan’Andriamanitra sy Kristy* Jesosy ary ny anjely voafidy mba hotandremanao izany zavatra izany ka tsy hisy fizahan-tavan’olona na fanaovana na inona na inona amin’ny fiangarana.

²²Aza malaky mametra-tanana amin’olona na iza na iza ary aza miombona ota amin’ny sasany; tahirizo madio ny tenanao.

²³Aza dia rano fotsiny no atao fisotro fa misotroa divay kely noho ny am-bavafonao sy ny fahosaosanao matetika.

²⁴Miharihary ny fahotan’ny olona sasany ka mialoha azy ho amin’ny fitsarana, fa ny an’ny sasany kosa dia manaraka ato aoriana.

²⁵Ary miharihary toy izany koa ny asa tsara; ary na ny ankoatra izany aza dia tsy ho azo afenina.