Read La Bible en Malgache 2Timoty 1 Bible Online

2Timoty 1 - La Bible en Malgache bible

2Timoty 1

¹I Paoly, apostolin’i Kristy* Jesosy noho ny sitrapon’Andriamanitra mba ho mpitory ny teny fikasana milaza ny fiainana izay ao amin’i Kristy Jesosy,

²no mamangy an’i Timoty, zanako malala: Ho aminao anie ny fahasoavana sy ny famindrampo ary ny fiadanana avy amin’Andriamanitra Ray sy Kristy Jesosy Tompontsika!

³Misaotra an’Andriamanitra izay tompoiko araka ny nataon’ny razako amin’ny fieritreretana madio aho; fa tsy manam-pitsaharana ny fahatsiarovako anao amin’ny fivavahako andro aman’alina;

⁴ary maniry hahita anao aho mba ho feno ny fifaliako satria tsaroako ny ranomasonao;

⁵fa nisy nahatsiarovako ny finoana tsy mihatsaravelatsihy izay ao anatinao, izay nitoetra taloha tao amin’i Loisa renibenao sy i Eonika reninao, ary matoky aho fa ao aminao koa izany.

⁶Noho izany dia mampahatsiaro anao aho mba hamelomanao ny fanomezam-pahasoavana avy amin’Andriamanitra, izay ao anatinao tamin’ny nametrahako ny tanako taminao.

⁷Fa tsy nomen’Andriamanitra fanahin’ny fahosana isika fa fanahin’ny hery sy ny fitiavana ary ny fahononan-tena.

⁸Koa aza menatra ny ho vavolombelon’ny Tompontsika ianao na amiko izay mpifatony. Fa aoka ianao ho mpiombona fahoriana amiko noho ny Filazantsara araka ny herin’Andriamanitra,

⁹dia izay namonjy antsika sy niantso antsika tamin’ny fiantsoana masina, tsy araka ny asantsika fa araka ny fikasany sy ny fahasoavany izay nomena antsika tao amin’i Kristy* Jesosy hatry ny fony fahagola.

¹⁰Naharihary izany ankehitriny tamin’ny nisehoan’i Kristy Jesosy, Mpamonjy antsika, izay nahafoana ny herin’ny fahafatesana, koa ny Filazantsara no nampisehoany mazava ny fiainana sy ny tsy fahalovana mandrakizay.

¹¹Ny amin’io Filazantsara io no nanendrena ahy ho mpitory sy Apostoly ary mpampianatra ny Jentilisa*.

¹²Ary noho izany koa no iaretako izao zavatra izao, koa tsy menatra aho satria fantatro Izy izay inoako, ary matoky aho fa Izy dia mahatahiry ilay zavatra natolony ahy mandra-piavin’izay andro izay.

¹³Tano amin’ny finoana sy ny fitiavana ao amin’i Kristy Jesosy ny mariky ny teny tsy misy kilema izay efa renao tamiko.

¹⁴Ilay zavatra tsara natolotra anao dia tahirizo amin’ny fampaherezan’ny Fanahy Masina izay mitoetra ao anatintsika.

¹⁵Fantatrao fa efa nahafoy ahy izay rehetra any Azia; isan’ireny i Figelo sy i Hermogena.

¹⁶Homen’ny Tompo famindrampo anie ny ankohonan’i Onesiforosy satria namelombelona ny fanahiko matetika sady tsy nahamenatra azy ny gadrako;

¹⁷fa raha tatỳ Roma izy dia nitady ahy fatratra ka hitany aho.

¹⁸Ny Tompo anie hampahita azy famindrampo avy amin’ny Tompo amin’izay andro izay. Ary fantatrao tsara fa be dia be ny fanompoana nataony tamiko tany Efesosy.