Read La Bible en Malgache 2Timoty 2 Bible Online

2Timoty 2 - La Bible en Malgache bible

2Timoty 2

¹Koa ianao, anaka, dia aoka hihahery amin’ny fahasoavana izay ao amin’i Kristy* Jesosy.

²Izay zavatra efa renao tamiko teo anatrehan’ny vavolombelona maro dia atolory ny olona mahatoky izay hahay hampianatra ny sasany kosa.

³Miaraha miaritra ny mafy amiko ianao, tahaka ny miaramila tsaran’i Kristy Jesosy.

⁴Ny miaramila manafika dia tsy mba misy maningo-tena amin’ny raharahan’izao fiainana izao, raha ta hahafaly izay efa nifidy azy ho miaramila izy.

⁵Raha misy mandray anjara amin’ny fifaninanana dia tsy satrohana satroboninahitra izy raha tsy manezaka araka ny fitsipi-dalao.

⁶Ny mpiasa tany izay misasatra no tokony ho voalohany handray ny vokatra.

⁷Diniho izay lazaiko fa homen’ny Tompo fahazavan-tsaina ny amin’ny zavatra rehetra ianao.

⁸Tsarovy Jesosy Kristy* izay natsangana tamin’ny maty, dia Ilay avy tamin’ny taranak’i Davida, araka ny Filazantsara toriko,

⁹izay iaretako fahoriana hatramin’ny fifatorana aza, toy ny mpanao ratsy; nefa ny tenin’Andriamanitra dia tsy mba voafatotra.

¹⁰Izany no iaretako ny zavatra rehetra noho ny amin’ny olom-boafidy mba hahazoan’ireny koa famonjena, dia ilay ao amin’i Kristy Jesosy, mbamin’ny voninahitra mandrakizay.

¹¹Mahatoky izao teny izao: Fa raha miara-maty Aminy isika dia hiara-belona Aminy koa;

¹²raha miaritra isika dia hiara-manjaka Aminy; raha mandà Azy isika dia handa antsika kosa Izy;

¹³fa na dia tsy mahatoky Azy aza isika dia mbola mahatoky ihany Izy satria tsy afaka handa ny tenany Izy.

¹⁴Izany zavatra izany no ampahatsiarovy ny olona; koa anaro mafy eo anatrehan’ny Tompo izy mba tsy hampiady teny satria tsy mahasoa akory izany fa mamadika ny mpihaino.

¹⁵Mazotoa manolotra ny tenanao amin’Andriamanitra ho olona voazaha toetra, dia mpiasa tsy mahazo henatra izay mizara tsara ny tenin’ny fahamarinana.

¹⁶Fa halaviro ny fibedibedena foana satria mbola handroso amin’ny haratsiam-panahy ihany izay mpanao izany,

¹⁷ary ny teniny dia hikiky tahaka ny homamiadana; isan’ireny i Himeneo sy i Fileto.

¹⁸Nania tamin’ny marina ireny ka milaza fa efa lasa sahady ny fitsanganan’ny maty, dia mandrava ny finoan’ny sasany izy amin’izany.

¹⁹Kanefa ny fanorenana mafy nataon’Andriamanitra dia miorina tsara sady manana izao tombo-kase izao: Ny Tompo mahalala ny azy, ary koa: Aoka ny olona rehetra izay manonona ny anaran’ny Tompo hiala amin’ny ratsy.

²⁰Fa ao amin’ny trano lehibe iray, tsy dia fanaka volamena sy volafotsy ihany no ao, fa fanaka hazo sy tany koa, ny sasany dia homem-boninahitra ary ny sasany dia halam-baraka.

²¹Koa raha misy olona manadio ny tenany ho afaka amin’ireny dia ho fanaka homem-boninahitra izy, efa nohamasinina ka mahasoa ho an’ny Tompo, voavoatra ho amin’ny asa tsara rehetra.

²²Mandosira ny filan’ny fahatanorana ary miezaha mitady fahamarinana, finoana, fitiavana, fihavanana amin’izay miantso ny Tompo amin’ny fo madio.

²³Fa mandava ny fanontaniana adaladala tsy misy antony satria fantatrao fa mahatonga ady izany.

²⁴Ary tsy mety raha miady ny mpanompon’ny Tompo, fa aoka ho malemy fanahy amin’ny olona rehetra, mahay mampianatra, mahalefitra,

²⁵mananatra ny mpanohitra amin’ny fahamoram-panahy; fa angamba Andriamanitra hanome fibebahana azy mba hahalalany tsara ny marina,

²⁶dia hody ny sainy ho afaka amin’ny fandriky ny devoly izay nanao azy sambo-belona hanao ny sitrapony.