Read La Bible en Malgache 2Timoty 4 Bible Online

2Timoty 4 - La Bible en Malgache bible

2Timoty 4

¹Eo anatrehan’Andriamanitra sy Kristy* Jesosy izay hitsara ny velona sy ny maty, ary noho ny amin’ny fisehoany sy ny fanjakany, no ananarako anao mafy:

²Mitoria ny teny, mazotoa, na amin’ny fotoana na tsy amin’ny fotoana, mandrese lahatra, mampirisiha, mananara mafy amin’ny fahari-po sy ny fampianarana rehetra.

³Fa ho avy ny andro izay tsy hahazakan’ny olona ny fampianarana tsy misy kilema; fa hangidihidy sofina izy dia hamory mpampianatra ho azy araka ny filany;

⁴ary hampiala ny sofiny amin’ny teny marina tokoa izy ka hivily ho amin’ny anganongano.

⁵Fa mahonòna tena kosa ianao amin’ny zavatra rehetra, miareta fahoriana, ataovy ny asan’ny evanjelista, tanteraho ny fanompoanao.

⁶Fa izaho dia efa hatolotra ho fanatitra aidina sahady ary efa mba akaiky ny andro fialako.

⁷Efa niady ny ady tsara aho, nahatanteraka ny fihazakazahako aho, nitahiry ny finoana aho.

⁸Hatramin’izao dia tahirizina ho ahy ny satroboninahitry ny fahamarinana, izay homen’ny Tompo, mpitsara marina, ho ahy amin’izay andro izay; ary tsy ho ahy ihany fa ho an’izay rehetra tia ny fisehoany koa.

⁹Ataovy izay hahatongavanao haingana atỳ amiko,

¹⁰fa efa nandao ahy i Demasy, noho ny fitiavany izao fiainana izao dia lasa nankany Tesalonika izy; i Kreska dia nankany Galatia, i Titosy dia nankany Dalmatia.

¹¹I Lioka ihany no ato amiko. Alao i Marka ka ento miaraka aminao fa mahasoa ahy amin’ny fanompoana izy.

¹²I Tikiko dia nirahiko ho any Efesosy.

¹³Ilay akanjobe navelako tany Troasy tao amin’i Karpo dia ento raha mankaty ianao. Ento koa ny boky, indrindra fa ireo boky hoditra.

¹⁴I Aleksandra, mpanefy varahina, dia nanisy ratsy ahy be loatra. Ny Tompo hamaly azy araka ny asany.

¹⁵Tandremonao ihany izy iny fa nanohitra fatratra ny teninay.

¹⁶Tamin’ny nandaharako voalohany hanala tsiny ny tenako dia tsy nisy nomba ahy fa nandao ahy avokoa izy rehetra. Mba tsy hisaina ho helony anie izany!

¹⁷Nitsangana teo anilako anefa ny Tompo ka nampahery ahy mba ho tanteraka tokoa amin’ny ataoko ny fitorian-teny ary mba ho ren’ny Jentilisa* rehetra izany. Ary izaho dia novonjena teo am-bavan’ny liona.

¹⁸Ny Tompo hanafaka ahy amin’ny asa ratsy rehetra ka hamonjy ahy ho any amin’ny fanjakany any an-danitra. Ho Azy anie ny voninahitra mandrakizay mandrakizay! Amena!

¹⁹Veloma any amin’i Prisila sy i Akoila mbamin’ny ankohonan’i Onesiforosy.

²⁰Nitoetra tany Korinto i Erasto, fa i Trofimo dia nilaozako tany Mileto satria narary izy.

²¹Ataovy izay hahatongavana atỳ alohan’ny ririnina. Manao veloma anao i Eobolo, i Poda, i Lino ary i Klaodia mbamin’ny rahalahy rehetra.

²²Homba ny fanahinao anie ny Tompo! Ho aminareo anie ny fahasoavana!