Read La Bible en Malgache Titosy 2 Bible Online

Titosy 2 - La Bible en Malgache bible

Titosy 2

¹Fa ianao kosa dia milazà izay mendrika ny fampianarana tsy misy kilema.

²Anaro hahonon-tena ny lehilahy zokiolona, ho maotina, ho hendry ary hatanjaka amin’ny finoana, amin’ny fitiavana, amin’ny faharetana.

³Ny vehivavy zokiolona koa dia anaro hitondra tena toy izay mendrika ny olona masina, tsy ho mpanendrikendrika, tsy ho andevozin’ny divay be, ho mpampianatra ny zavatra tsara,

⁴mba hampianarany ny vehivavy tanora ho tia ny vadiny, ho tia ny zanany,

⁵hahonon-tena, ho madio toe-panahy, hiasa ao an-tranony, ho tsara fanahy, hanaiky ny vadiny, mba tsy hitenenana ratsy ny tenin’Andriamanitra.

⁶Anaro hahonon-tena koa ny lehilahy tanora;

⁷amin’ny zavatra rehetra dia asehoy ny tenanao ho fianarana ny asa tsara, amin’ny fampianaranao madio sy maotina,

⁸ny teny tsy misy kilema, izay tsy azo kianina, mba ho menatra izay manohitra satria tsy hisy ratsy hitenenany anareo.

⁹Ny mpanompo koa dia anaro hanaiky ny tompony mba hanao izay ankasitrahany amin’ny zavatra rehetra fa tsy hamalivaly,

¹⁰tsy hangala-tety, fa haneho izay toe-panahy mahatoky indrindra mba hampahamendrika ny fampianaran’Andriamanitra, Mpamonjy antsika, amin’ny zavatra rehetra.

¹¹Fa efa miseho ny fahasoavan’Andriamanitra izay famonjena ny olona rehetra.

¹²Izany dia mampianatra antsika handa izay toe-panahy tsy araka an’Andriamanitra sy ny filan’izao tontolo izao fa ny mba ho velona amin’ny onony sy ny marina ary ny toe-panahy araka an’Andriamanitra amin’izao fiainana ankehitriny izao,

¹³eo am-piandrasana ny fanantenana mahafinaritra sy ny fisehoan’ny voninahitr’Andriamanitra lehibe sady Mpamonjy antsika, dia Jesosy Kristy*.

¹⁴Nanolotra ny tenany hamonjy antsika Izy mba hanavotany antsika ho afaka amin’ny ota rehetra sy hanadiovany izay olona ho an’ny tenany sady ho mazoto indrindra amin’ny asa tsara.

¹⁵Izany no lazao sy ananaro ary andrarao amin’ny fahefana rehetra. Aza avela hisy hanao tsinontsinona anao!