Read La Bible en Malgache Titosy 3 Bible Online

Titosy 3 - La Bible en Malgache bible

Titosy 3

¹Mampahatsiarova azy hanaiky izay mitondra sy manam-pahefana, hanoa tsara, ho vonona ho amin’ny asa tsara rehetra,

²tsy hiteny ratsy olona, tsy ho mpila ady, fa ho mpandefitra, maneho ny halemem-panahy rehetra amin’ny olona rehetra.

³Fa isika koa dia mba adala fahiny, tsy nanaiky, voafitaka; eny, andevon’ny filana sy ny fahafinaretana isan-karazany ary velona teo amin’ny lolompo sy ny fialonana sady nankahalaina no nifankahala.

⁴Fa rehefa niseho ny fahamoram-panahin’Andriamanitra, Mpamonjy antsika, sy ny fitiavany ny olona,

⁵dia tsy tamin’ny asa mety ho nataontsika tamin’ny fahamarinana, fa araka ny famindrampony kosa no namonjeny antsika, rehefa nosasana tamin’ny fahaterahana indray sy ny fanavaozana nataon’ny Fanahy Masina,

⁶izay narotsany betsaka tamintsika tamin’ny alalan’i Jesosy Kristy*, Mpamonjy antsika,

⁷mba hohamarinina amin’ny fahasoavany isika ka ho tonga mpandova araka ny fanantenana ny fiainana mandrakizay.

⁸Mahatoky ireo teny ireo, ary izany zavatra izany dia tiako hitompoanao mafy, ho an’izay mino an’Andriamanitra ka mieritreritra hamirapiratra amin’ny asa tsara. Sady tsara no mahasoa ny olona izany zavatra izany.

⁹Fa halaviro kosa ny fanontaniana adaladala, ny tantaram-pirazanana, ny fifandirana, ny ady teny ny amin’ny lalàna; fa tsy mahasoa sady zava-poana izany.

¹⁰Izay mpanao hevi-diso, rehefa nanarinao indray mandeha na indroa, dia ialao

¹¹satria fantatrao fa efa mivadika izay manao izany ka sady manota izy no manamelo-tena koa.

¹²Rehefa maniraka an’i Artema na i Tikiko ho atỳ aminao aho dia miezaha hankany amiko any Nikopolia ianao fa mikasa handany ny ririnina any aho.

¹³Vatsio tsara i Zena mpahay lalàna sy i Apolosy mba tsy hisy izay hanahirana azy.

¹⁴Aoka koa ny olontsika hianatra hazoto amin’ny asa tsara mba hahazoany izay zavatra tena ilainy fa tsy mba ho isan’izay tsy mamokatra izy.

¹⁵Manao veloma anao izay rehetra atỳ amiko. Veloma any amin’izay rehetra tia antsika amin’ny finoana. Ho aminareo rehetra anie ny fahasoavana!