Read La Bible en Malgache Filemona 1 Bible Online

Filemona 1 - La Bible en Malgache bible

Filemona 1

¹I Paoly, mpifatotra noho ny amin’i Kristy* Jesosy, sy i Timoty rahalahy, no mamangy an’i Filemona, ilay malalanay sy mpiara-miasa aminay,

²mamangy an’i Apia anabavinay koa sy i Arkipo, miaramila namantsika, ary ny fiangonana[1] ao an-tranonao:

³Ho aminareo anie ny fahasoavana sy ny fiadanana avy amin’Andriamanitra Raintsika sy Jesosy Kristy Tompo.

⁴Misaotra an’Andriamanitro mandrakariva aho raha mahatsiaro anao amin’ny vavaka ataoko

⁵satria reko ny fitiavanao sy ny finoana izay anananao ny amin’i Jesosy Tompo sy ho an’ny olona masina rehetra.

⁶Mba hiasa mafy ho an’i Kristy* anie ny fiombonana avy amin’ny finoanao, amin’ny fahalalana ny zavatra tsara rehetra izay ao anatintsika!

⁷Fa nanana fifaliana sy fiononana amin’ny fitiavanao aho, ry rahalahy, satria efa novelombelominao ny fon’ny olona masina.

⁸Koa na dia manana fahasahiana be ao amin’i Kristy* handidy anao amin’izay mendrika aza aho

⁹dia aleoko, izaho Paoly izay efa antitra sady mpifatotra noho ny amin’i Kristy Jesosy no miangavy anao ankehitriny noho ny fitiavana.

¹⁰Eny, miangavy anao aho ny amin’ny zanako izay naterako teto amin’ny fifatorako, dia i Onesimosy,

¹¹ilay tsy nahasoa anao fahiny, nefa mahasoa antsika ankehitriny; dia ianao sy izaho;

¹²averiko atỳ aminao indray izy izay sombin’ny aiko.

¹³Saika nohazoniko tatỳ amiko izy mba hanompo ahy hisolo anao eto amin’ny fifatorako noho ny Filazantsara,

¹⁴nefa raha tsy mahalala izay hevitrao aho aloha dia tsy ta hanao na inona na inona mba tsy ho toy ny an-tery ny soa ataonao fa an-tsitrapo.

¹⁵Izany angamba no nialany vetivety teo aminao mba hanananao azy mandrakizay,

¹⁶tsy ho toy ny andevo intsony anefa fa mihoatra noho ny andevo: Rahalahy malala indrindra ho ahy izy, mainka fa ho anao, na ao amin’ny nofo na ao amin’ny Tompo.

¹⁷Koa raha ataonao fa namanao aho dia raiso toa ahy izy.

¹⁸Raha nanao izay tsy marina taminao izy na nitrosa taminao dia ataovy ho anjarako izany.

¹⁹Izaho Paoly no manoratra izany amin’ny tanako, izaho no handoa izany, mba tsy hilazako aminao fa ianao mihitsy indray no manan-trosa amiko.

²⁰Eny, ry rahalahy, mba ataovy ho fifaliako avy aminao ao amin’ny Tompo izany; ampandrio ny saiko noho ny amin’i Kristy.

²¹Noho ny fahatokiako fa hanaiky ianao no anoratako aminao, koa fantatro fa hanao mihoatra noho izay lazaiko aza ianao.

²²Ary izao koa: Mba anomany efitrano hitoerako aho; fa manantena aho fa hahazo fahafahana noho ny vavaka ataonareo.

²³Manao veloma anao i Epafra, mpifatotra namako ao amin’i Kristy* Jesosy,

²⁴i Marka, i Aristarko, i Demasy ary i Lioka, mpiara-miasa amiko.

²⁵Ho amin’ny fanahinareo anie ny fahasoavan’i Jesosy Kristy Tompo.