Read La Bible en Malgache Hebreo 10 Bible Online

Hebreo 10 - La Bible en Malgache bible

Hebreo 10

¹Eny, ny lalàna dia mitondra aloky ny zava-tsoa ho avy, fa tsy ny tena endrik’ireny. Ny lalàna dia tsy mahatonga ho tanteraka ny olona izay manatona ka mitondra fanatitra atolotra tsy tapaka isan-taona.

²Fa raha tsy izany dia tsy ho nitsahatra va ireny fanolorana fanatitra ireny ka ireo izay mandray anjara amin’izany fanompoam-pivavahana izany dia ho efa voadio indray mandeha ary tsy henjehin’ny fieritreretany ny amin’ny fahotany intsony?

³Kanefa amin’ireny fanatitra ireny dia misy fahatsiarovana ny ota isan-taona.

⁴Fa tsy mahaisotra ny ota ny ran’ombilahy sy ny ran’osilahy.

⁵Koa nony niditra tamin’izao fiainana izao Izy dia niteny hoe: «Tsy mba nilainao ny fanatitra alatsa-dra sy ny fanatitra avy amin’ny zavamaniry, fa tena no namboarinao ho Ahy;

⁶Tsy sitrakao ny fanatitra dorana manontolo sy ny fanatitra noho ny ota;

⁷dia hoy Aho: Inty Aho tonga, ao amin’ny horonam-boky no nanoratana Ahy, hanao ny sitraponao, Andriamanitra ô» (Sal 40.6-8).

⁸Rehefa voalaza taloha hoe: Tsy ilainao ary tsy sitrakao ny fanatitra alatsa-dra, ny fanatitra avy amin’ny zavamaniry, ny fanatitra dorana manontolo ary ny fanatitra noho ny ota, dia ireny atolotra araka ny lalàna ireny,

⁹dia hoy indray Izy: Inty Aho tonga hanao ny sitraponao. Manaisotra ny voalohany Izy mba hampitoerany ny faharoa.

¹⁰Amin’izany sitrapo izany no nanamasinana antsika tamin’ny nanolorana ny tenan’i Kristy indray mandeha monja ho fanatitra.

¹¹Ny mpisorona rehetra dia mitsangana isanandro manao fanompoam-pivavahana sy manolotra ireny fanatitra ireny ihany matetika, saingy tsy mahaisotra ny ota ireny;

¹²fa Izy kosa, rehefa avy nanolotra fanatitra iray monja ho mandrakizay noho ny ota, dia mipetraka eo ankavanan’Andriamanitra.

¹³Koa hatramin’izao dia miandry Izy mandra-panaony ny fahavalony ho fitoeran-tongony.

¹⁴Fa ny fanatitra iray ihany no efa nahatanterahany ho mandrakizay izay olona hamasinina.

¹⁵Manambara izany amintsika koa ny Fanahy Masina; fa rehefa voalazany hoe:

¹⁶«Izao no fanekena hataoko aminy rehefa afaka izany andro izany, hoy NY TOMPO: Hataoko ao am-pony ny lalànako sady hosoratako ao an-tsainy;

¹⁷ny fahotany sy ny helony dia tsy hotsarovako intsony» (Jer 31.33-34).

¹⁸Ary rehefa misy famelana ireo dia tsy misy fanatitra noho ny ota intsony.

¹⁹Koa amin’izany, ry rahalahy, dia manana fahatokiana hiditra ao amin’ny fitoerana masina isika noho ny ran’i Jesosy,

²⁰amin’izay lalana natokany ho antsika, dia lalana vaovao sady velona, namakivaky teo amin’ny efitra lamba, dia ny nofony izany,

²¹sady manana mpisorona lehibe mitandrina ny tranon’Andriamanitra isika.

²²Aoka isika hanatona amin’ny fo marina sy amin’ny fahatokiana be avy amin’ny finoana, manana fo voadio ho afaka amin’ny fieritreretana ratsy sy fo tena voasasa tamin’ny rano madio;

²³aoka hohazonintsika mafy ny fanekena ny fanantenana mba tsy hihozongozonany, satria mahatoky ilay nanao ny teny fikasana;

²⁴ary aoka isika hifampandinika hampandroso ny fitiavana sy ny asa tsara.

²⁵Aza mahafoy ny fiarahantsika miangona, tahaka ny fanaon’ny sasany, fa mifananara kosa, mainka satria hitanareo fa efa antomotra ny andro.

²⁶Fa raha minia manota isika rehefa nahazo ny fahalalana tsara ny marina dia tsy misy fanatitra noho ny ota intsony,

²⁷fa fiandrasana mahatahotra amin’ny fitsarana ary fahatezerana mirehitra izay handany ny fahavalo rehetra kosa.

²⁸Izay manohitra ny lalànan’i Mosesy dia maty amin’ny tenin’ny vavolombelona roa na telo ka tsy asiana famindrampo.

²⁹Manao ahoana kosa ary, araka ny hevitrareo, ny hamafin’ny fampijaliana tokony hihatra amin’izay nanitsakitsaka ny Zanak’Andriamanitra ka nanao ny ran’ny fanekena izay nanamasinana azy ho zavatra tsy masina sady naniratsira ny Fanahin’ny fahasoavana?

³⁰Fa fantatsika izay niteny hoe: «Ahy ny famaliana; Izaho no hamaly»; ary koa: «NY TOMPO hitsara ny olony» (Deo 32.35-36).

³¹Zavatra mahatahotra no ho azon’ny tanan’Andriamanitra velona.

³²Fa tsarovy ny andro fahiny izay niaretanareo ny ady mafy tamin’ny fahoriana rehefa nandray ny mazava ianareo;

³³indraindray dia natao ho faneso noho ny fanaratsiana sy ny fampahoriana ianareo, ary indraindray koa dia tonga naman’izay azon’izany.

³⁴Fa sady niara-niaritra tamin’izay nifatotra ianareo no nifaly raha norobaina ny fanananareo satria fantatrareo fa ianareo dia manana fananana tsara lavitra sady maharitra.

³⁵Koa aza manary ny fahatokianareo izay misy valisoa lehibe.

³⁶Fa tokony hanana faharetana ianareo mba hahazoanareo izay lazain’ny teny fikasana, rehefa vitanareo ny sitrapon’Andriamanitra.

³⁷Fa «rehefa afaka fotoana kelikely dia ho tonga ilay ho avy fa tsy hitaredretra».

³⁸Ary «ny oloko marina dia ho velon’ny finoana; fa raha mihemotra izy dia tsy sitraky ny fanahiko» (Hab 2.3-4).

³⁹Fa isika tsy mba naman’izay mihemotra ho amin’ny fahaverezana fa naman’izay mino ho amin’ny famonjena ny fanahy.