Read La Bible en Malgache Hebreo 13 Bible Online

Hebreo 13 - La Bible en Malgache bible

Hebreo 13

¹Aoka haharitra ny fitiavana ny rahalahy.

²Aza manadino ny fampiantranoana vahiny; fa tamin’izany dia nampiantrano anjely ny sasany, nefa tsy fantany.

³Tsarovy izay mifatotra ka ho toy ny miara-mifatotra aminy ianareo, ary izay ampijalina satria manana vatana mety mijaly koa ianareo.

⁴Aoka hanan-kaja amin’ny olona rehetra ny fanambadiana, ary aoka tsy ho voaloto ny fandriana; fa ny mpijangajanga sy ny mpaka vadin’olona dia hohelohin’Andriamanitra.

⁵Aoka tsy ho amin’ny fitiavam-bola ny toe-tsainareo, fa mianìna amin’izay anananareo; fa hoy Izy: «Izaho tsy handao anao mihitsy na hahafoy anao akory» (Jos 1.5).

⁶Koa sahy miteny isika hoe: «NY TOMPO no Mpamonjy ahy ka tsy hatahotra aho. Inona no azon’ny olona atao amiko?» (Sal 118.6)

⁷Tsarovy ny mpitondra anareo izay efa nitory ny tenin’Andriamanitra taminareo; hevero ny niafaran’ny fiainany ka araho ny finoany.

⁸Jesosy Kristy no tsy miova omaly sy anio ary mandrakizay.

⁹Aza mety avilin’ny fampianarana maro hafahafa ianareo. Fa tsara raha ampiorenina amin’ny fahasoavana ny fo fa tsy amin’ny hanina izay tsy mahasoa akory ny mahavatra azy.

¹⁰Isika manana alitara izay tsy ananan’ny mpanompo ny tabernakely fahefana hihinanana.

¹¹Fa rehefa noentin’ny Mpisoronabe niditra ho ao amin’ny fitoerana masina ho fanatitra noho ny ota ny ran’ny biby dia nodorana teny ivelan’ny toby ny fatiny.

¹²Noho izany, Jesosy koa dia niaritra teny ivelan’ny vavahady mba hahamasina ny olona amin’ny rany.

¹³Koa aoka isika hivoaka hankeo Aminy eo ivelan’ny toby ka hitondra ny latsa izay noentiny.

¹⁴Fa tsy manana tanàna maharitra isika etỳ fa mitady ny ho avy.

¹⁵Koa aoka isika hanolotra mandrakariva ny fanati-piderana ho an’Andriamanitra amin’ny alalany, dia ny vokatry ny molotra izay manaiky ny anarany.

¹⁶Fa aza manadino hanao soa sy hiantra fa fanatitra toy izany no sitrak’Andriamanitra.

¹⁷Maneke ny mpitondra anareo ka manajà azy; fa miambina ny fanahinareo izy, araka izay tokony hataon’ny olona mbola hampamoahina, mba hanaovany izany amin’ny fifaliana fa tsy amin’ny fisentoana; fa tsy hahasoa anareo izany.

¹⁸Mivavaha ho anay; satria matoky izahay fa manana fieritreretana tsara ka te hitondra tena tsara amin’ny zavatra rehetra.

¹⁹Nefa mainka mangataka anareo hanao izany aho mba hampidina ahy haingankaingana kokoa ho atỳ aminareo.

²⁰Ary Andriamanitry ny fiadanana, izay nitondra an’i Jesosy Tompontsika, Mpiandry ondry lehibe, hiala amin’ny maty, mitondra ny ran’ny fanekena mandrakizay,

²¹Izy anie hahatanteraka anareo amin’ny tsara rehetra hanao ny sitrapony ka hiasa ao anatinareo izay ankasitrahana eo imasony amin’ny alalan’i Jesosy Kristy*; ho Azy anie ny voninahitra mandrakizay mandrakizay! Amena!

²²Ary mangataka aminareo aho, ry rahalahy, aoka ianareo hahazaka izao teny fananarana izao; fa efa nanoratra epistily fohifohy ho anareo ihany aho.

²³Aoka ho fantatrareo fa efa afaka i Timoty rahalahintsika; koa raha tonga haingana izy dia hiaraka aminy hamangy anareo aho.

²⁴Mampamangy any amin’izay rehetra mpitondra anareo sy ny olona masina rehetra. Izay any Italia dia manao veloma anareo.

²⁵Ho aminareo rehetra anie ny fahasoavana! Amena!