Read La Bible en Malgache Hebreo 3 Bible Online

Hebreo 3 - La Bible en Malgache bible

Hebreo 3

¹Koa amin’izany, ry rahalahy masina, mpiombona ny fiantsoana avy any an-danitra, diniho tsara ny Apostoly sy ny Mpisoronabe izay ekentsika, dia Jesosy

²izay mahatoky eo anatrehan’ny nanendry Azy, tahaka an’i Mosesy koa tao amin’ny tranon’Andriamanitra manontolo.

³Fa Izy dia natao mendrika hanam-boninahitra noho i Mosesy, araka ny ananan’ny mpanao trano voninahitra bebe kokoa noho ny trano nataony.

⁴Fa ny trano rehetra dia samy nisy mpanao azy; fa izay nanao ny zavatra rehetra kosa dia Andriamanitra.

⁵Ary i Mosesy dia mpanompo nahatoky tao amin’ny tranon’Andriamanitra manontolo, mba ho vavolombelona hanambara izay zavatra mbola holazaina;

⁶fa Kristy* kosa dia Zanaka mifehy ny tranon’Andriamanitra; ary isika no tranony raha hazonintsika mafy hatramin’ny farany ny fahatokiana sy firavoravoana ateraky ny fanantenana.

⁷Koa araka izay lazain’ny Fanahy Masina hoe: «Anio, raha mandre ny feony ianareo

⁸dia aza manamafy ny fonareo tahaka ny tamin’ny fahasosorana, tamin’ny andron’ny fakam-panahy tany an-tany efitra,

⁹izay nakan’ny razanareo fanahy Ahy tamin’ny nizahany toetra Ahy, nefa dia nahita ny asako efapolo taona izy.

¹⁰Koa tezitra tamin’izany taranaka izany Aho ka niteny hoe: Ireo dia maniasia amin’ny fony mandrakariva ka tsy nahalala ny lalako.

¹¹Izany no nianianako tamin’ny fahatezerako hoe: Tsy hiditra amin’ny fitsaharako mihitsy izy» (Sal 95.7-11).

¹²Tandremo, ry rahalahy, fandrao hisy aminareo hanana fo ratsy tsy mino ka hiala amin’Andriamanitra velona.

¹³Fa mifananara isanandro raha mbola atao hoe Anio, fandrao hisy aminareo ho tonga mafy fo noho ny famitahan’ny ota.

¹⁴Fa efa tonga mpiombona amin’i Kristy* isika raha mihazona mafy ny fiandohan’ny fahatokiantsika hatramin’ny farany;

¹⁵raha lazaina hoe: «Anio, raha mandre ny feony ianareo, dia aza manamafy ny fonareo tahaka ny tamin’ny fahasosorana» (Sal 95.7-8).

¹⁶Fa iza moa no nahatezitra Azy rehefa nandre? Tsy izay rehetra noentin’i Mosesy niala tany Ejipta va?

¹⁷Ary iza no nahatezitra Azy efapolo taona? Tsy izay nanota va, dia ireo niampatrampatra tany an-tany efitra ny fatiny?

¹⁸Ary iza no nianianany fa tsy hiditra any amin’ny fitsaharany, afa-tsy izay tsy nanaiky?

¹⁹Dia hitantsika fa tsy nahazo niditra izy ireo noho ny tsy finoany.